បើម៉ាក់ៗជ្រុះសក់មិនបាត់ក្រោយសម្រាលកូន វាអាចមកពីកង្វះវីតាមីនសំខាន់ៗទាំងនេះ
បទពិសោធមានកូនដំបូង ស្ត្រីអាចជួបរឿងប្លែកៗលើខ្លួនរហូតនឹកស្មានមិនដល់។ មានករណីខ្លះអាចជាកត្តាទូទៅនៃធម្មជាតិ ឯខ្លះទៀតមកពីការថែទាំខ្លួនមិនបានដិតដល់។ ដូចជាការជ្រុះសក់នៅពេលសម្រាលកូនរួចវាជារឿងធម្មតាទៅហើយសម្រាប់ស្ត្រី ដោយសារតែអ័រម៉ូនម្យ៉ាងហៅថា Estrogen មានការធ្លាក់ចុះដែលបណ្តាលឱ្យសក់ជ្រុះនៅអំឡុងពេលមួយខ្លី។ យ៉ាងណាមិញ បើស្ត្រីសម្គាល់ឃើញថាសក់នៅតែជ្រុះមិនបាត់ វាអាចមកពីកត្តាកង្វះវីតាមីនមួយចំនួនដែលរាងកាយត្រូវការប្រចាំថ្ងៃ។ ការបំពេញវីតាមីនគ្រប់គ្រាន់មកវិញ វាអាចជួយដល់ការបណ្តុះសក់ កាត់បន្ថយសក់ជ្រុះ រួមទាំងធ្វើឱ្យសក់មានសុខភាពល្អ។
១. វីតាមីន C
វីតាមីន C ផ្ទុកទៅដោយសារធាតុប្រឆាំងអុកស៊ីតកម្មយ៉ាងច្រើនដូចគ្នាទៅនឹងវីតាមីន E និង ស័ង្កសីដែរ។ សារធាតុប្រឆាំងអុកស៊ីតកម្មនេះ ជួយកាត់បន្ថយការបំផ្លាញដោយរ៉ាឌីកាល់សេរីដែលជះផលអាក្រក់ចំពោះសក់។ តាមធម្មតារាងកាយស្ត្រីត្រូវការវីតាមីន C ៧៥ មីលីក្រាមក្នុងមួយថ្ងៃ។ បើស្ត្រីមានផ្ទៃពោះ និង កំពុងបំបៅដោះកូនអាចទទួលយកត្រឹម ៣៥ មីលីក្រាមជាប្រចាំ។ ស្ត្រីអាចបរិភោគអាហារផ្ទុកវីតាមីន C ដូចជា ពពួកផ្លែក្រូច ម្ទេសប្លោកលឿង ល្ហុង និង ស្ត្រូបឺរី។
២. វីតាមីន E
វីតាមីន E ផ្ទុកនូវសារធាតុប្រឆាំងអុកស៊ីតកម្មច្រើនបំផុត វាមានសមត្ថភាពខ្ពស់ក្នុងការប្រយុទ្ធប្រឆាំងនឹងការបំផ្លាញដោយរ៉ាឌីកាល់សេរីទៅលើស្បែក និង ស្បែកក្បាល។ សារធាតុនេះនឹងជំរុញវីតាមីន E ឱ្យទៅពង្រឹងលើមុខងារការពារសរីរាង្គ និង ជាលិកានៃសក់ដែលរងការបំផ្លាញដោយរ៉ាឌីកាល់សេរី។ វីតាមីន E មាននៅក្នុងពពួកស្ពៃបៃតង ប្រេងផ្កាឈូករ័ត្ន គ្រាប់ផ្លែឈើ ល្ពៅ និង ដំឡូងជ្វា។ បើស្ត្រីចង់លេបវីតាមីន E ត្រូវប្រាកដថាលេបត្រឹម 400 IU ក្នុងមួយថ្ងៃ និង មិនត្រូវលើសពី 1000 IU។
៣. វីតាមីន A
វីតាមីន A ជួយជំរុញដល់ការលូតលាស់របស់សក់ និង ល្អបំផុតសម្រាប់សុខភាពស្បែក។ ស្ត្រីអាចទទួលយកវីតាមីន A តាមរយៈការលេបប្រភេទគ្រាប់ ឬ អាចយកគ្រាប់វីតាមីនចោះយកទឹកមកលាបម៉ាស្សានៅលើស្បែកក្បាល និង សក់ផ្ទាល់តែម្តង។ ចំពោះអាហារដែលមានផ្ទុកវីតាមីន A មានដូចជា ការ៉ុត ដំឡូងជ្វា ពពួកស្ពៃខៀវ ល្ពៅ និង ត្រសក់ស្រូវ ជាដើម។
៤. អាស៊ីតខ្លាញ់អូមេហ្គា ៣
អាស៊ីតខ្លាញ់អូមេហ្គា ៣ អាចការពារការតម្ពែកដែលបណ្តាលមកពីបញ្ហាខាងក្រៅ និង អាចកាត់បន្ថយការតម្ពែកដែលបណ្តាលមកពីតំណពូជ។ ស្ត្រីអាចទទួលទានប្រេងត្រី ១ ស្លាបព្រាកាហ្វេ ឬ គ្រាប់វីតាមីនប្រេងត្រី ១ ទៅ ២ គ្រាប់ ក្នុងមួយថ្ងៃ ដែលវាអាចជួយការពារសក់ជ្រុះ និង ជំរុញឱ្យសក់ដុះឡើងវិញ។
៥. ជាតិដែក
គ្មានជាតិដែកគ្រប់គ្រាន់សក់នឹងកាន់តែជ្រុះច្រើន ឯសរសៃសក់នឹងចាប់ផ្តើមផុយ។ ស្រ្តីតែងជួបបញ្ហាខ្វះជាតិដែកដោយសារបាត់បង់ឈាមនៅពេលមករដូវ ជាពិសេសនៅពេលមានផ្ទៃពោះ និង ពេលកំពុងបំបៅដោះកូន។ កង្វះជាតិដែកអាចរាប់បញ្ចូលការប្រឈមជំងឺខ្វះឈាម។ អ្នកអាចទទួលយកជាតិដែកតាមរយៈអាហារដូចជា សណ្តែកក្រហម អ៊យស្ទ័រ ថ្លើមសត្វ ពពួកស្ពៃខៀវ និងគ្រាប់ល្ង។ ស្ត្រីអាយុ ១៩-៥០ ឆ្នាំ អាចទទួលយកជាតិដែក ១៨ មីលីក្រាមក្នុងមួយថ្ងៃ និង អាយុចាប់ពី ៥០ ឆ្នាំឡើងទៅ ទទួលយក ៨ មីលីក្រាមក្នុងមួយថ្ងៃ។ ចំពោះស្រីមានផ្ទៃពោះវិញអាច ២៧ មីលីក្រាម ក្នុងមួយថ្ងៃ និងស្ត្រីកំពុងបំបៅដោះ ១០ មីលីក្រាមក្នុងមួយថ្ងៃ។
៦. Biotin
Biotin ជាពពួកនៃវីតាមីន B។ ការទទួលយក Biotin គ្រប់គ្រាន់តាមរយៈរបបអាហារ និង ថ្នាំគ្រាប់ អាចជួយឱ្យសក់រឹងមាំ និង ការពារសក់ពីភាពផុយស្រួយ។ អាហារដែលសម្បូរទៅដោយជាតិ Biotin មានដូចជា សណ្តែកដី ថ្លើមសត្វ បន្លែបៃតង ស៊ុតស្ងោរ និង ស៊ុតឆៅ។
៧. ស័ង្កសី
អ្នកមានស្បែកក្បាលស្ងួតលាយឡំអង្គែអាចបណ្តាលមកពីកង្វះស័ង្កសី។ ការកង្វះវីតាមីន A និង D ក៏ជាហេតុផលនៃការធ្លាក់ចុះស័ង្កសីផងដែរ។ ការកង្វះស័ង្កសី និង ទទួលយកស័ង្កសីច្រើនលើសលុបពេកក៏បណ្តាលឱ្យកើតបញ្ហាជ្រុះសក់ផងដែរ។ តាមធម្មតាសារធាតុស័ង្កសីនៅក្នុងខ្លួនមនុស្សបង្កើតបានជាប្រេងធម្មជាតិ និង រក្សាសំណើមដល់ស្បែក។ ដូចនេះស្ត្រីអាចទទួលទានអាហារដែលមានផ្ទុកស័ង្កសីដូចជា អ៊យស្ទ័រ ពពួកសណ្តែក គ្រាប់ល្ពៅ ស៊ុតស្រស់ ថ្លើមសត្វ ស្រូវសាលី សណ្តែកសៀង និង គ្រាប់ផ្លែឈើ៕
