ក្រោយបែកស្នេហា មនុស្សស្រីធម្មតាតែងបន្ទោសប្រុសៗ តែមនុស្សស្រីដ៏អស្ចារ្យ ធ្វើរឿង ៣ យ៉ាងនេះ

ជាទូទៅ ក្រោយគូស្នេហ៍បានជួបនូវរឿងរ៉ាវបែកបាក់ស្នេហា គេសង្កេតឃើញថា នារីមួយចំនួនភាគច្រើន តែងនៅខូចចិត្តត្រាំត្រែង និង និយមបន្ទោសទៅកាន់ដៃគូស្នេហារបស់ខ្លួន និង ចោទថា ប្រុសម្នាក់ណាក៏ដូចម្នាក់ណា សុទ្ធតែមិនល្អទាំងអស់ ។ ដោយឡែកសម្រាប់នារីដ៏អស្ចារ្យ ក្រោយពេលបែកបាក់ស្នេហា គេពុំពោលពាក្យបែបនេះឡើយ តែគេងាកមកធ្វើរឿងដ៏មានប្រយោជន៍ ៣​ យ៉ាងនេះវិញ ដែលមានដូចជា ៖

១. គេតែងផ្ដល់ពេលវេលាដល់ខ្លួនឯង ឱ្យបានច្រើនជាងមុន

យើងមិនមាននាឡិកាសម្រាប់វាស់ស្ទង់ដួងចិត្ត ថានឹងអាចយកឈ្នះទុក្ខព្រួយនៅពេលណាបាននោះទេ ។ ដូច្នេះហើយក្រោយពេលបែកបាក់ នារីដ៏អស្ចារ្យតែងចំណាយពេលឱ្យខ្លួនឯងឱ្យបានច្រើនជាងមុន យកចិត្តទុក្ខដាក់លើខ្លួនឯង ធ្វើរឿងដែលគេចង់ធ្វើ ញ៉ាំអាហារដែលគេចូលចិត្ត និង លេងកីឡាដើម្បីសុខភាព ហើយរឿងដែលដាច់ខាតនោះគឺ ក្រោយបែកបាក់ គេមិនយកពេលវេលារកអ្នកថ្មីជំនួសភ្លាមៗឡើយ ព្រោះការដែលបាត់បង់ដៃគូម្ដងទៀត នឹងធ្វើឱ្យស្ថានការរបស់គេកាន់តែពិបាកស្រោចស្រង់ ។

២. គេមិនទប់អារម្មណ៍ឡើយ ត្រូវយំគឺយំ ដើម្បីប្រឈមមុខភាពឈឺចាប់ និង ឆ្លងវាឱ្យផុត

អ្នកអាចនឹងមិនយល់ស្របនូវចំណុចនេះ តែមនុស្សស្រីដ៏អស្ចារ្យ ក្រោយពេលបែកបាក់ស្នេហា ប្រសិនបើគេចង់យំ គឺយំហ៊ូភ្លាមៗ បញ្ចេញអារម្មណ៍ឈឺចាប់របស់គេដែលមាននៅក្នុងខ្លួន ហើយព្យាយាមយកឈ្នះវាឱ្យបាន ។  មិនតែប៉ុណ្ណោះ គេមិនចូលចិត្តលាក់រឿងរ៉ាវនៅក្នុងចិត្ត ឱ្យមានអារម្មណ៍កាន់តែរំខានឡើយ គេតែងអនុញ្ញាតឱ្យខ្លួនឯងប្រឈមមុខនឹងវា ហើយឆ្លងផុតពីវា ។

៣. គេតែងថ្លឹងថ្លែងពីទំនាក់ទំនងដែលធ្លាប់មាន និង ចាប់ផ្ដើមរកផ្លូវចេញសាងអនាគតថ្មី

ជាការពិតណាស់ រឹងមាំពីការបែកបាក់ មនុស្សស្រីចាប់ផ្ដើមអង្គុយសញ្ជឹងគិតពីចំណុចវិជ្ជមាន និង ភាពអវិជ្ជមាននៃទំនាក់ទំនងដែលធ្វើឱ្យគេឈឺចាប់ ។  ក្រោយការគិត កាន់តែធ្វើឱ្យគេជម្នះការឈឺចាប់ ដើម្បីរៀនពីវា និង ចាប់ផ្ដើមជីវិតថ្មីបន្តឆ្ពោះទៅមុខ ដោយភាពជឿជាក់ ។ ក្រោយធ្វើបែបនេះ គេពុំអនុញ្ញាតឱ្យភាពឈឺចាប់របស់អតីតកាល ធ្វើឱ្យគេបដិសេធនូវរឿងល្អៗ ដែលកំពុងរង់ចាំគេឡើយ ៕

ប្រែសម្រួលពី ៖ PhunuToday