ឈប់រត់តាមស្នេហា ដែលគេស្ទើរស្រឡាញ់ ស្ទើរអត់ វាគ្មានប្រយោជន៍ទេ
វាហាក់ដូចជាបន្ទាបតម្លៃខ្លួនឯងពេកដឹង វាហាក់ដូចជាធ្វើបាបខ្លួនឯងទេដឹង ហើយវាហត់នឿយខ្លាំងពេកទេដឹង ដែលអ្នកតែងតែព្យាយាមធ្វើឱ្យគេស្រលាញ់អ្នកខ្លាំង ដូចអ្នកដែរ ? បើដឹងច្បាស់តាំងពីដើមទីថាគេមិនស្រលាញ់អ្នកខ្លាំង ឬ មិនបានតាំងចិត្តថាស្រលាញ់ពិតប្រាកដ អ្នកគួរតែដើរចេញតាំងពីយូរ មិនគួរបណ្ដោយឱ្យចិត្តស្រលាញ់គេកាន់តែខ្លាំង ហើយពិបាកដកខ្លួនចេញនោះទេ ។
ដល់ដំណាក់កាលមួយដែលអ្នកកាន់តែស្រលាញ់គេខ្លាំង គឺអ្នកនឹងកាន់តែពិបាកដកខ្លួន ព្រោះជានិច្ចកាលអ្នកតែងផ្ដល់ក្ដីសង្ឃឹមឱ្យខ្លួនឯង នៅពេលដែលគេយកចិត្តទុកដាក់លើអ្នកបន្តិចបន្តួច ខណៈកន្លងទៅគេតែងមិនសូវអើពើ ឬ រវីរវល់ជាមួយអ្នកផងនោះ ។ មកដល់ចំណុចមួយដែលអ្នកគិតថា នឹងព្យាយាមបន្តទៀត មិនព្រមចុះចាញ់ ហើយជឿថា ថ្ងៃណាមួយគេនឹងតបស្នងក្ដីស្រលាញ់វិញ តែចុងក្រោយវាបានត្រឹមតែធ្វើឱ្យអ្នកខាតបង់ពេលវេលា បិទផ្លូវខ្លួនឯង ធ្វើបាបខ្លួនឯងតែប៉ុនណោះ ។ អ្នកត្រូវចាំថា ប្រសិនបើគេស្រលាញ់អ្នកពិតមែន គេនឹងព្យាយាមធ្វើគ្រប់បែបយ៉ាងឱ្យអ្នកជឿជាក់លើស្នេហាមួយនេះ ធ្វើឱ្យអ្នកមានភាពកក់ក្ដៅ មិនមែនទុកអ្នកចោល ហើយឱ្យអ្នកក្លាយជារត់តាមស្នេហា ចំណែកគេក្លាយជាព្រះនាងម្ចាស់ ឬ ព្រះអង្គម្ចាស់នោះឡើយ ។
តាមពិតអ្នកនៅតែអាចដកខ្លួនចេញពីស្នេហាស្រពេចស្រពិលមួយនេះ បើអ្នកពិតជាចង់ចាកចេញ ហើយមិនយកមនោសញ្ចេតនា ឬ ក្ដីស្រលាញ់ទៅផ្ញើលើគេម្នាក់នោះតទៅទៀត ។ ទទួលស្គាល់ថា វាពិតជាការឈឺចាប់ដ៏ខ្លាំងក្លាបំផុតសម្រាប់ជីវិតអ្នក ហើយវាពិតជាពិបាកឆ្លងកាត់បំផុត តែបើអ្នកនៅតែបន្ត គឺស្មើនឹងអ្នកមិនស្រលាញ់ខ្លួនឯង ។ គ្មាននរណាម្នាក់នៅលើលោកនេះស្រលាញ់អ្នកជាងអ្នកខ្លួនឯងនោះទេ វាដល់ពេលដែលអ្នកគួរដើរចេញពីគេទៅ ឈប់រត់តាមស្នេហាដែលគ្មានសង្ឃឹម ហើយវាបានធ្វើឱ្យជីវិតអ្នកសោះកក្រោះស្ទើរតែរាល់ថ្ងៃ ។
មនុស្សដែលស្រលាញ់យើងពិតប្រាកដ ទោះយើងមិនបានធ្វើអ្វីសោះក៏គេអាចស្រលាញ់បាន តែបើគេគ្មានចិត្តនឹងស្រលាញ់ ទោះយើងខំព្យាយាមធ្វើគ្រប់បែបយ៉ាងក៏មិនអាចយកបានបេះដូងគេដែរ ។ មិនមែនមកពីយើងមិនស្អាត មិនមែនមកពីយើងគ្មានចំណុចល្អនោះទេ តែមកពីយើងមិនមែនជាប្រភេទមនុស្សដែលអាចចូលក្នុងបេះដូងគេ ហើយប្រហែលជាគេនៅរង់ចាំមនុស្សម្នាក់ផ្សេងទៀតក្រៅពីយើង ។ ការចាកចេញជាជម្រើសល្អបំផុត ដែលអាចស្រោចស្រង់ស្នាមញញឹមរបស់អ្នកត្រឡប់មកវិញ ៕
អត្ថបទ ៖ រាជ
