Golden Heritage គឺការបង្ហាញម៉ូដសម្លៀកបំពាក់ថ្មី របស់ម៉ាកហ្វេហ្សិនវៀតណាម LE THANH HOA ដែលបានធ្វើឡើងកាលពីថ្ងៃទី ០២ ខែមេសា ឆ្នាំ ២០២៤។ ម៉ាកហ្វេហ្សិននេះមានភាពល្បីល្បាញជាសកល ដែលស្ថាបនិកត្រូវបានគេស្គាល់ថា ជាជនជាតិវៀតណាម គឺ លោក Le Thanh Hoa។
លោក Le Thanh Hoa ចាប់កំណើតនៅវៀតណាមក្នុងឆ្នាំ ១៩៨៥ ។ លោកបានបញ្ចប់ការសិក្សាផ្នែកច្នៃម៉ូដហ្វេហ្សិន (Fashion Design) ពីសាកលវិទ្យាល័យស្ថាបត្យកម្ម (University of Architecture) នៅទីក្រុងហូជីមិញ។ នៅក្នុងឆ្នាំ ២០០៩ លោកបានឈ្នះពានរង្វាន់លេខ ១ ក្នុងការប្រកួតច្នៃម៉ូដហ្វេហ្សិនក្រោមប្រធានបទ «Aquafina Pure Fashion»។ ភ្លាមៗបន្ទាប់ពីបញ្ចប់ការសិក្សា លោកត្រូវបានគេស្គាល់មុខ ជាអ្នកបង្ហាញខូឡិកហ្សិនច្រើនបំផុត នៅក្នុងព្រឹត្តិការណ៍ហ្វេហ្សិនកំពូលៗរបស់វៀតណាម។
បន្ទាប់មកនៅឆ្នាំ ២០១២ លោក Le Thanh Hoa បានសម្ពោធម៉ាកហ្វេហ្សិនរបស់ខ្លួន ដោយប្រើឈ្មោះរបស់លោកផ្ទាល់ ធ្វើជាម៉ាកយីហោគឺ LE THANH HOA។ ម៉ាកនេះបង្កើតឡើងក្នុងបំណងក្លាយជាអ្នកដឹកនាំថ្មី ដែលរីកសាយនៅក្នុងឧស្សាហកម្មហ្វេហ្សិនវៀតណាម។ ម្ចាស់ម៉ាកយីហោបានប្តេជ្ញាចំពោះប្រ៊េន ដោយនាំមកនូវភាពទំនើប ស៊ីវិល័យ និង Classy ដោយដាក់បញ្ចូលជាមួយប្រណីតភាព និង អេឡហ្គង់បំផុត រួមទាំងស្នាដៃដែលមានគុណភាពខ្ពស់។
នៅវៀតណាម ម៉ាកនេះមានភាពល្បីល្បាញខ្លាំង ហើយសិល្បៈច្នៃម៉ូដរបស់លោកបានឆ្ពោះទៅដល់កម្រាលព្រំក្រហមសកលជាច្រើន។ ក្នុងនោះរាប់ទាំងកម្មវិធីពានរង្វាន់អូស្កា និង កម្មវិធី Cannes Film Festival ផងដែរ។ ស្ទីលដ៏ unique ផ្ទាល់ខ្លួនរបស់ លោក Le Thanh Hoa គឺ ការច្របាច់បញ្ចូលគ្នារវាងប្រពៃណី និង ស្ទាយ៌សហសម័យ៕
