នារីវ័យក្មេងម្នាក់ សុខចិត្តជួលបង្គន់ក្នុងក្រុមហ៊ុនស្នាក់នៅ មួយខែ ៦ ដុល្លារ ព្រោះចង់សន្សំលុយទិញផ្ទះទិញឡាន

នារីជនជាតិចិនម្នាក់ឈ្មោះ Yang វ័យ ១៨ ឆ្នាំ ជាបុគ្គលិកនៅក្រុមហ៊ុនលក់គ្រឿងសង្ហារិមមួយនាខេត្ត Hunan បានក្លាយជាបុគ្គលដែលមានមហាជនជាច្រើនលើបណ្ដាញសង្គមផ្ទុះចាប់អារម្មណ៍ នៅពេលដែលនាងចែករំលែកពីជីវិតជួលបន្ទប់ទឹកទំហំ ៦ ម៉ែត្រការ៉េដើម្បីស្នាក់នៅ។ តាមការរៀបរាប់របស់ Yang បានឱ្យដឹងថា បន្ទប់ដែលនាងជួលស្នាក់នៅនោះគឺជាបន្ទប់ទឹករបស់ក្រុមហ៊ុនដែលនាងធ្វើការផ្ទាល់ ដោយនាងជួលក្នុងតម្លៃ ៥០ យ័ន (ប្រមាណជាង ៦ ដុល្លារ)។

តាមរយៈវីដេអូខ្លីៗដែលបង្ហាញឱ្យឃើញនារីវ័យក្មេង ខាងលើកំពុងលាងសម្អាតបន្ទប់ បត់ខោអាវ ចម្អិនអាហារ រួមទាំងសម្រាកក្នុងបន្ទប់ទឹកនោះបានទាក់ទាញឱ្យមានមនុស្សចូលមើលយ៉ាងច្រើន។ ក្នុងវីដេអូនោះដែរ ក៏បង្ហញឱ្យឃើញរូបនាងយកក្រណាត់ធំបិទបាំងបន្ទប់ទឹកនោះ រួមទាំងដាក់គ្រែបត់នៅពីមុខទ្វារដើម្បីកុំឱ្យមានមនុស្សចេញចូលបាន។ សម្រាប់ខោអាវគឺនាងបោកគក់នៅក្នុងបន្ទប់ រួចយកទៅហាលនៅលើដំបូលក្រុមហ៊ុន។ Yang និយាយថាកន្លែងនាងគេងតែងតែស្អាតជានិច្ច ព្រោះនាងតែងតែសម្អាតជារៀងរាល់ថ្ងៃ។

អំឡុងពេលថ្ងៃ នៅពេកដែលហាងបើក នាងតែងតែរើរបស់របរផ្សេងៗចេញដើម្បីទុកបន្ទប់ទឹកឱ្យបុគ្គលិកដទៃ រួមទាំងភ្ញៀវប្រើប្រាស់។ ជាកូនកើតក្នុងគ្រួសារអ្នកក្រ Yang បានបោះបង់ការសិក្សាតាំងពីនាងអាយុ ១៦ ឆ្នាំ ដើម្បីមកធ្វើការរកប្រាក់។ នាងរកបានប្រមាណ ៣ ពាន់យ័នក្នុងមួយខែ ប៉ុន្តែនាងចាយវាយត្រឹមតែ ៣០០ ទៅ ៤០០ យ័នប៉ុណ្ណោះ ដើម្បីសន្សំលុយទុកទិញផ្ទះ និង ឡានមួយជារបស់ខ្លួនឯង។

Yang បានបន្ថែមថា ៖ «មានកន្លែងដេកបានគឺគ្រប់គ្រាន់ហើយ ខ្ញុំមិនចង់ចាយប្រាក់លើថ្លៃជួលថ្លៃៗនោះទេ»។ នៅពេលដែលរឿងរ៉ាវរបស់នាងផ្ទុះខ្លាំងលើបណ្ដាញសង្គមមានមនុស្សជាច្រើនសង្ស័យថា នេះគ្រាន់តែជាសាច់រឿងនាងបង្កើតឡើងដើម្បីទាញចំណាប់អារម្មណ៍ប៉ុណ្ណោះ តែយ៉ាងណា ខាងថៅកែក្រុមហ៊ុនក៏បានបញ្ជាក់ថានេះគឺជារឿងពិតប្រាកដ មិនមែនជារឿងប្រឌិតនោះឡើយ ហើយថ្លៃឈ្នួល ៦ ដុល្លារនោះគឺជាថ្លៃសម្រាប់បង់ទឹក និង ភ្លើងប៉ុណ្ណោះ។

គួរឱ្យដឹងថា ខាងអ្នកគ្រប់គ្រងហាងបានព្យាយាមរកបន្ទប់ជួលឱ្យ Yang ជាច្រើនលើកដែរ តែថ្លៃជួលនៅតំបន់នោះគឺចន្លោះ ៨០០ ទៅ ១០០០ យ័ន ដែលវាថ្លៃខ្លាំងសម្រាប់ Yang។ ដំបូងឡើយ ខាងក្រុមហ៊ុនឱ្យនាងស្នាក់នៅក្នុងអូហ្វិស តែដោយសារនាងចង់បានកន្លែងផ្ទាល់ខ្លួនទើបសម្រេចទៅនៅក្នុងបន្ទប់ទឹកបែបនេះ៕

ទស្សនាវីដេអូនៅទីនេះ