អាយុគ្រាន់តែតួលេខ ប៉ុន្តែបើអាយុកាន់តែកើនចូលដល់វ័យ ៣០+ ហើយ ឱកាសស្វែងរកស្នេហ៍ពិតអាចជាការលំបាកបន្តិច។ ទោះជាយ៉ាងនេះក្តី វាក៏ហាក់មិនយឺតពេលពេកដែរ។ បើសិនអ្នកសិ្ថតនៅក្នុងវ័យ ៣០+ កុំទាន់អស់សង្ឃឹម វ័យនេះអាចពិបាក ឬក៏ងាយស្រួលគឺអាស្រ័យលើខ្លួនអ្នក។ ខាងក្រោមនេះជាវិធី ៥ យ៉ាង ដើម្បីបង្កើនឱកាសស្វែងរកស្នេហាពិត ក្នុងវ័យ ៣០+។
១. ស្គាល់ខ្លួនឯងឱ្យច្បាស់ជាមុនសិន
មុននឹងអ្នកអាចរកបានស្នេហាពិត អ្នកត្រូវយល់ពីខ្លួនឯង។ នេះមានន័យថាជាការបញ្ជាក់ពីបំណងរបស់អ្នក តើអ្នកចង់បានគូជីវិតបែបណា? មានអត្តចរិតបែបណា? ហើយជានារីមានស្ថិតក្នុងលំដាប់ស្តង់ដារបែបណា? បើសិនអ្នកច្បាស់ពីអ្វីដែលអ្នកចង់បានហើយ បើកចិត្តស្វែងរកតែម្តងទៅ។
២. ពង្រីករង្វង់សង្គមរបស់អ្នក
បើសិនអ្នកកំណត់ពីនារីក្នុងក្ដីស្រមៃរួចហើយ អ្នកបន្តធ្វើរឿងដដែលៗ ដើរលេងនៅកន្លែងដដែលៗ ដូចកង្កែបក្នុងអណ្ដូងប្រហែលជាអ្នកមិនអាចជួបមនុស្សថ្មីទេ។ អ្នកគួរសាកល្បងដើរក្នុងសង្គមឱ្យបានច្រើន ចូលរួមក្នុងសកម្មភាពរៀនសូត្រផ្សេងៗ ទៅក្លឹបហាត់ប្រាណ ឬ ព្រឹត្តិការណ៍អ្វីមួយ ដូចជា កិច្ចប្រជុំ ឬ សូម្បីតែការងារស្ម័គ្រចិត្តផ្សេងៗ ដោយសកម្មភាពទាំងនេះអាចណែនាំអ្នកទៅកាន់បុគ្គលថ្មីៗ និង ស្គាល់មនុស្សដែលមានគំនិតដូចអ្នក ហើយថាមិនត្រូវស្នេហាអាចលេចឡើងក្នុងស្ថានភាពនោះដែលអ្នកមិននឹកស្មានដល់។
៣. បង្កើតការណាត់ជួបតាមអ៊ីនធឺណែត
ការណាត់ជួបតាមអ៊ីនធឺណែតអាចមានអារម្មណ៍ហត់នឿយ ប៉ុន្តែវាក៏ជាវេទិកា និង ជាវិធីសាស្រ្តមួយដើម្បីស្វែងរកដៃគូដែលត្រូវចិត្តបានដែរ។ អ្នកអាចជ្រើសរើសលេងកម្មវិធីស្វែងរកដៃគូណាមួយដែលមានភាពច្បាស់លាស់ និង ត្រឹមត្រូវ ហើយនៅលើប្រូហ្វាល់ អ្នកគួរតែដាក់បង្ហាញពីព័ត៌មានពិតរបស់អ្នក និង រូបភាពផ្លូវការ ជាជាងការដាក់រូបបោកបញ្ឆោត។ នៅពេលអ្នកបង្ហាញពីភាពច្បាស់លាស់ និង Type របស់អ្នកហើយនោះ វាគឺជាឱកាសដែលគេបានឃើញអ្នក និង អ្នកផ្ទាល់បានឃើញពីគេលើអ៊ីនធឺណែតដែរ នោះការណាត់ជួបមួយនឹងកើតឡើងបាន។
៤. បើកចិត្តទទួលអ្នកថ្មី ឬ Move On
មនុស្សជាច្រើនជួបការលំបាកក្នុងការស្វែងរកស្នេហា ដោយសារពួកគេមិនមានអារម្មណ៍បើកចំហ នៅមានការសោកស្ដាយ ឬ ការភ័យខ្លាច ព្រោះពួកគេធ្លាប់មានស្នាមរបួសពីអតីតកាល ធ្លាប់ខូចចិត្តពីមុនរហូតរាងចាល។ ជួនកាលពួកគេនៅមានអារម្មណ៍មន្ទិលអំពីស្នេហា ឬ ខ្លាចការតាំងចិត្ត ខ្លាចនឹងងាយរងគ្រោះ និង ត្រូវគេបោកចិត្តទៀត។ យ៉ាងណាមិញ បើសិនអ្នកនៅតែគិតរឿងអតីតកាលច្រើនពេក ខ្លាចច្រើនពេក នោះអ្នកគ្មានថ្ងៃជួបអ្នកថ្មីឡើយ ជំនួសមកវិញអ្នកត្រូវក្លាហាន និង បន្តដំណើរទៅមុខ ដោយព្យាបាលការរបួសពីអតីតកាល ហើយអនុញ្ញាតឱ្យនរណាម្នាក់ចូលក្នុងជីវិតអ្នក និង បានព្យាបាលរបួសនោះ។
៥. បើកចំហចំពោះស្នេហាដែលមិននឹកស្មានដល់
ពេលខ្លះស្នេហាកើតឡើងតាមរបៀបដែលយើងនឹកស្មានមិនដល់។ ពីមុនៗអាចថាអ្នកបានជួបមនុស្សត្រឹមត្រូវក្នុងជីវិត ឬ មនុស្សដែលគេមានចិត្តលើអ្នករួចហើយ ប៉ុន្តែអ្នកប្រហែលជាមិនចាប់អារម្មណ៍ ឬ ធ្លាប់មើលរំលងគេ ព្រោះគេមិនស្ថិតនៅក្នុងស្តង់ដាររបស់អ្នកបានកំណត់។ យ៉ាងណាមិញ ពេលវេលាកន្លងទៅ អ្នកបានជួបគេម្ដងទៀតស្ថិតក្នុងស្ថានភាពផ្សេង និង រូបគេមានការផ្លាស់ប្ដូរ អាចថាអ្នកចាស់គឺល្អផងក៏ថាបាន បើអ៊ីចឹងនោះអ្នកគួរតាមញ៉ែគេវិញទៅ។
សរុបមក ការស្វែងរកស្នេហាពិតមិនមែនពឹងលើសំណាងនោះទេ ប៉ុន្តែវាគឺជាការយល់ដឹងដោយខ្លួនឯង ការខិតខំប្រឹងប្រែង និង ការបើកចិត្តទទួល។ បើអ្នកបានតម្រឹមខ្លួនអ្នកជាមួយនឹងសេចក្ដីស្រឡាញ់ណាមួយដែលអ្នកស្វែងរកហើយ នោះលទ្ធផលនឹងហុចឱ្យអ្នក៕
