ខេត្តបាត់ដំបង ត្រូវបានគេស្គាល់ថាជាខេត្តដែលមានសក្តានុពលទេសចរច្រើនអនេក និង មានកន្លែងកម្សាន្តល្បីៗមិនចាញ់ខេត្តដទៃឡើយ រួមមានទាំងតំបន់ទេសចរធម្មជាតិ និង កែច្នៃដ៏សម្បូរបែប ជាមេដែកទាក់ទាញភ្ញៀវទេសចរឱ្យចូលទស្សនាកម្សាន្តទឹកដីដ៏មនោរម្យនេះឥតដាច់។
ថ្ងៃនេះ យើងសូមលើកយកនូវកន្លែងលម្ហែកម្សាន្តមួយស្ថិតក្នុងភូមិសាស្ត្រខេត្តបាត់ដំបងនេះ ដោយសារនៅទីនោះមានទឹកហូរក្រោមស្ពានតិចៗ គួរឱ្យចង់កម្សាន្តស័ក្តិសមសម្រាប់លេងកម្សាន្តជួបជុំបែបលក្ខណៈគ្រួសារ ដោយនៅទីនោះមានឈ្មោះថា «ស្ពានយោលចង្ហូរថ្ម»។
ស្ពានយោលចង្ហូរថ្ម មានទីតាំងស្ថិតនៅក្នុងភូមិសសរពក ឃុំកន្ទឺ ១ ស្រុកបាណន់ ខេត្តបាត់ដំបង មានចម្ងាយប្រមាណ ២៨ គីឡូម៉ែត្រ គិតពីសាលាខេត្តបាត់ដំបង និង មានចម្ងាយត្រឹមតែ ៨ គីឡូម៉ែត្រប៉ុណ្ណោះពីប្រាសាទបាណន់ ដែលនៅទីនោះមានទឹកថ្លាឈ្វេងហូរតិចៗ មានសភាពរាក់ល្មមលេងកម្សាន្ត ផ្ដល់នូវភាពងាយស្រួលក្នុងការលេងទឹកប្រកបដោយក្ដីសប្បាយរីករាយ។
មិនត្រឹមតែប៉ុណ្ណោះ ស្ពានយោលចង្ហូរថ្ម ដែលមានចម្ងាយប្រមាណ ៨ គីឡូម៉ែត្រប៉ុណ្ណោះ ពីប្រាសាទបាណន់នេះ ក៏មានលក់ម្ហូបអាហារ ភេសជ្ជៈ និង ក្រចុះអង្គុយលេងលម្ហែកាយផងដែរ៕
ប្រភព និង រូបភាព ៖ មន្ទីរទេសចរណ៍
