មកទល់ពេលនេះ ស្ថានភាពប្រទេសជាតិ នៅតែធ្វើឱ្យមហាជនកម្ពុជាបន្តមានការព្រួយបារម្ភខ្លាំងនៅឡើយ ក្រោយកម្ពុជាបានរងការបាញ់ប្រហារពីទាហានថៃបណ្ដាលឱ្យពលរដ្ឋស្លូតត្រង់រងរបួស និង បាត់បង់ជីវិត កាលពីថ្ងៃទី ១២ ខែវិច្ឆិកា ឆ្នាំ ២០២៥ កន្លងទៅ។
ពេលនេះដែរ លើបណ្ដាញសង្គមមហាជន ក៏ដូចជាអ្នកក្នុងសិល្បៈជាច្រើន បានធ្វើការចែករំលែកនូវរូបភាព ក៏ដូចជាវីដេអូផ្សេងៗ ដោយប្រើសំឡេងនិយាយប្រឆាំងនឹងអំពើឈ្លានពានវាយប្រហាររបស់ថៃមកលើកម្ពុជា ព្រមទាំងចូលរួមធ្វើជាមូលនិធិសប្បុរសធម៌ ដើម្បីរៀបចំស្បៀងអាហារ និង សម្ភារៈសម្រាប់ជូនកងទ័ពជួរមុខ និង ជនភៀសសឹក។
ជាក់ស្ដែង ក្រឡេកមើលស្មារតីស្នេហាជាតិរបស់តារាចម្រៀងស្រី ពេជ្រ សូលីកា វិញ ស្របពេលស្ថានភាពប្រទេសជាតិមានបញ្ហាជាថ្មីនេះដែរ នាងក៏បានបង្ហាញការចូលរួមចែករំលែកដោយប្រើសំឡេងប្រឆាំងនឹងអំពើឈ្លានពានរបស់ថៃ ព្រមទាំងប្រកាសផ្អាកការងារចេញច្រៀងតាមឆាកតន្រ្តីឯកជនភ្លាមៗ។
លើសពីនេះ តាមរយៈមូលនិធិរបស់អ្នកនាង គង់ ស្រីនីន ក៏បានបង្ហាញពីការចូលរួមសប្បុរសធម៌របស់តារាស្រី ពេជ្រ សូលីកា ដែរ គឺអ្នកនាងបានចូលរួមជាថវិការចំនួន ២០០០ ដុល្លារក្នុងចំណែកនៃការរៀបចំសម្ភារៈផ្ដល់ជំនួយដល់វីរជនជួរមុខ និង គ្រួសារភៀសសឹកផងដែរ៕
