ខ្លាំងពីឪពុកដល់កូន! លោក សេង សំរិទ្ធស័ក្តិ អភិវឌ្ឍន៍ម៉ាកសម្លៀកបំពាក់ថ្មី ស្ទីលក្លាសិកសហសម័យ កំពុងត្រូវចិត្តយុវវ័យ

លោក សេង សំរិទ្ធស័ក្តិ គឺជាជាងវាស់កាត់សម្លៀកបំពាក់ ដែលមានបទពិសោធក្នុងវិស័យសម្លៀកបំពាក់ក្លាសិកជាង ១០ ឆ្នាំមកហើយ។ កន្លងមក លោកធ្លាប់បានទៅបណ្តុះបណ្តាលជំនាញ នៅសាលាកាត់ដេរឈានមុខគេនៅលើពិភពលោក Savile Row Academy នៅឯទីក្រុងឡុងដ៍ ចក្រភពអង់គ្លេស ផងដែរ។ ថ្មីថ្មោងនេះ លោកទើបតែបង្កើតម៉ាកសម្លៀកបំពាក់ថ្មីមួយឈ្មោះថា The Symmetry ដែលផ្តោតទៅលើស្ទីលសម្លៀកបំពាក់បែបក្លាសិកសហសម័យ (Contemporary Cl​assic) មា​នមូលដ្ឋាននៅទីក្រុងភ្នំពេញ។

ជាមួយម៉ាក The Symmetry​ ស្ថាបនិក លោក សេង សំរិទ្ធស័ក្តិ ថាសម្លៀកបំពាក់របស់លោក ផលិតឡើងសម្រាប់មនុស្សគ្រប់វ័យមានដូចជា៖ អាវក្រៅ, អាវប៉ូឡូ, អាវយឺត, ខោ Chino, ខោខ្លី និង គ្រឿងតុបតែងលម្អផ្សេងៗ។ គ្រប់ផលិតផលទាំងអស់ មិនថាសាច់ក្រណាត់ឬម៉ូដ សុទ្ធសឹងត្រូវបានសម្រិតសម្រាំង ឆ្លងកាត់ការរចនា និង ការស្រាវជ្រាវពីក្រុមការងារដែលមានជំនាញរបស់ The Symmetry។

លោកពន្យល់អំពីនាមម៉ាកយីហោ The Symmetry  យ៉ាងដូច្នេះ៖ « The Symmetry បើក្នុងន័យទូទៅ វាជាភាពស្មើគ្នារវាងឆ្វេង និង ស្តាំ  ហើយបើសម្រាប់ពួកយើងវិញ គឺមានន័យថា ភាពសមសួនក្នុងការស្លៀកពាក់។» ​

មែនទែនទៅ ម៉ាក The Symmetry មិនមែនកើតឡើងតែឯងនោះទេ ពោលម៉ាកនេះមានប្រភពចេញមកពីម៉ាកយីហោធំមួយ ដែលមានកេរ្តិ៍ឈ្មោះល្បីល្បាញក្នុងវិស័យវាស់កាត់សម្លៀកបំពាក់ច្រើនជំនាន់មកហើយ។  តាមការឱ្យដឹងរបស់ ស្ថាបនិក សេង សំរិទ្ធស័ក្តិ លោកបានរៀបរាប់ថា ម៉ាក The Symmetry បានប្រសូតចេញពីម៉ាកយីហោសម្លៀកបំពាក់វាស់កាត់ដ៏មានកេរ្តិ៍ឈ្មោះមួយគឺ Asia Mode ដែលបង្កើតឡើងដោយឪពុករបស់លោកផ្ទាល់។​  Asia Mode បង្កើតឡើងតាំងពីឆ្នាំ  ១៩៩៦ ភ្ញៀវដែលមកវាស់កាត់ ភាគច្រើនជាមន្ត្រី រដ្ឋមន្ត្រី ជាពិសេស សម្តេចនាយករដ្ឋមន្ត្រី ក៏ជាអតិថិជនប្រចាំផងដែរ។

ជាមួយការផលិតផ្តោតយកគុណភាព ក្នុងមួយឈុតៗ Asia Mode អាចប្រើពេលធ្វើដល់ទៅពីរខែឬអាចលើសពីនេះ។ ខណៈតម្រូវការកាន់តែច្រើនឡើង ម្យ៉ាងដើម្បីសម្រួលដល់ការផលិតនេះផងនោះ Asia Mode បានបង្កើតម៉ាកមួយទៀតឈ្មោះថា Asia Mode Finery សម្រាប់ការផលិតទៅលើសម្លៀកបំពាក់ដែលមានស្រាប់ៗ ដែលផ្តល់ដំណោះស្រាយទាំងការវាស់កាត់ផង និង សម្រាប់ភ្ញៀវដែលមិនចង់រង់ចាំយូរផងដែរ។

បន្ទាប់មកទៀត ដោយឃើញថា Trend ឬ ទំនោរនិយម នៃការស្លៀកពាក់បែបក្លាសិករបស់បុរសមានការពេញនិយម តែយ៉ាងណាមិញ ការស្លៀកពាក់បែបនេះនៅកម្ពុជានៅមានកម្រិត ទើបធ្វើឱ្យ លោក សេង សំរិទ្ធស័ក្តិ ដែលជាកូនប្រុសម្ចាស់ម៉ាកយីហោ Asia Mode មានគំនិតបង្កើតម៉ាកមួយទៀតគឺ The Symmetry។ ម៉ាកនេះបង្កើតឡើងក្នុងបំណងលើកស្ទួយវិស័យស្លៀកពាក់បែបក្លាសិក ដោយបញ្ចូលការស្លៀកពាក់នេះទៅក្នុងជីវិតប្រចាំថ្ងៃជាបែប Casual Wear ឬ Occasion Wear​។

ចំពោះបេសកកម្មរបស់ The Symmetry ស្ថាបនិករូបនេះលើកឡើងថា៖ «យើងចង់លើកទឹកចិត្តឱ្យមានការស្លៀកពាក់បែបក្លាសិក សាមញ្ញហើយសមសួន មានការផ្ចិតផ្ចង់ និង មានភាពជាខ្លួនឯង។ ពួកយើងចង់លើកកម្ពស់វិស័យនេះ ព្រមទាំងចង់ឱ្យក្លាយជាសហគមន៍មួយសម្រាប់អ្នកចូលចិត្តសម្លៀកបំពាក់បែបនេះផងដែរ»៕