តារាស្រីកម្ពុជា ៦ រូប ឆក់បានឱកាសបញ្ចេញសមត្ថភាពសម្តែងរឿងបរទេស

មហាជនអ្នកនិយមទស្សនាខ្សែភាពយន្តទាំងក្នុង និង ក្រៅប្រទេស ច្បាស់ជាធ្លាប់បានដឹងមកហើយពីភាពល្បីល្បាញរបស់តារាប្រុសស្រីកម្ពុជាមួយចំនួន ដែលមានប្រជាប្រិយភាពឆក់បានឱកាសចូលរួមសម្តែងលើឆាកអន្តរជាតិជាច្រើន។ ជាក់ស្តែង ក្រឡេកមកមើលតារាស្រី ៦ រូប ខាងក្រោមនេះវិញ បើទោះជាបានឈរលើវិថីសិល្បៈក្នុងនាមជាសិល្បការិនីវ័យក្មេងក៏ពិតមែន តែម្នាក់ៗបានបោះជំហានចូលរួមសម្តែងខ្សែភាពយន្តរបស់បរទេស។

១. អ្នកនាង ស្វែង សុជាតា

ជាការពិតណាស់ មហាជនអ្នកគាំទ្រតារាសម្តែង ស្វែង សុជាតា ច្បាស់ជាបានជ្រាបមកហើយពីទេពកោសល្យសម្តែងតួអង្គគ្រប់ទម្រង់របស់អ្នកនាងយ៉ាងល្អឥតខ្ចោះ ដែលធ្វើឱ្យអ្នកនាងក្តោបបានប្រជាប្រិយភាព និង ត្រូវបានចាត់ទុកជាតារាសម្តែងស្រីកម្ពុជាកម្រនឹងមានអ្នកធ្វើតាមបាន។ អ្នកនាង ស្វែង សុជាតា មិនត្រឹមតែទទួលបានប្រជាប្រិយភាពក្នុងប្រទេសកម្ពុជានោះទេ អ្នកនាងក៏ជាតារាសម្តែងដែលល្បីសុសសាយលើឆាកអន្តរជាតិផងដែរ។ ក្នុងនោះ ខ្សែភាយន្តដែលអ្នកនាងបានសម្តែងនឹងតារាបរទេស ក៏ដូចជាផលតិករបរទេសមានរឿង «First They Killed My Father» រឿង «Mind Cage» និង រឿង «Hex»។

២. កញ្ញា ស៊ីន យូប៊ីន

កំពូលតារាភាពយន្តវ័យក្មេងកម្ពុជា កញ្ញា ស៊ីន យូប៊ីន មិនត្រឹមតែឆក់តំណែងជាតួសម្តែងក្នុងប្រទេសនោះទេ កាលពីអំឡុងឆ្នាំ ២០១៩ កន្លងទៅ កញ្ញា ស៊ីន យូប៊ីន ក៏បានក្តោបតំណែងជាតួឯស្រីក្នុងខ្សែភាពយន្ត «The Protect» ឬ «Bodyguard» ដែលផលិត ដឹកនាំសម្តែង និង ថតនៅប្រទេសថៃ។ ក្នុងខ្សែភាពយន្តខាងលើនេះ កញ្ញា ស៊ីន យូប៊ីន បានចូលរួមសម្តែងជាមួយនឹងតារាថៃលោក Mum Jokmok និង លោក P’Dim Tatto Colour Petchtai Wongkamlao ព្រមទាំងតារាប្រុសស្រីថៃជាច្រើនរូបទៀត។

៣. អ្នកនាង ឌី សូនីត្តា

តារាស្រី ឌី សូនីត្តា កាលពីអំឡុងឆ្នាំ ២០១៨ មានឱកាសបានចូលរួមសម្តែងក្នុងខ្សែភាពយន្តខ្នាតធំលំដាប់អន្តរជាតិ មានចំណងជើងថា «The Prey»។ ខ្សែភាពយន្ត «The Prey» នេះ បើទោះជាបានផលិតដោយផលតិកម្ម កងចក្រភាពយន្ត របស់កម្ពុជាក៏ពិតមែន តែអ្នកនាង ឌី សូន្តីតា គឺជាតារាស្រីកម្ពុជាតែម្នាក់គត់ទទួលបានតំណែងតួឯកជាមួយនឹងកំពូលតារាល្បីៗចំនួន ២ ប្រទេសផ្សេងទៀតដូចជា ប្រទេសថៃ និង ប្រទេសចិន។ ក្នុងរឿងខាងលើនេះ អ្នកនាង ឌី សូនីត្តា សម្តែងជាតួឯកជាមួយនឹងតារាភាពយន្តចិនលោក Gu Shang Wei។

៤. កញ្ញា សំ ថារ័ត្ន

កីឡាការិនីគុនល្បុកត្តោ កញ្ញា សំ ថារ័ត្ន បានបង្ហាញវត្តមានយ៉ាងមានមោទកភាពក្នុងការសម្តែងភាពយន្តបរទេស និង បានបង្ហាញក្បាច់គុនល្បុកត្តោក្នុងរឿង «Shotgun Wedding» ឬ «អាពាហ៍ពិពាហ៍បះសក់»។ ខ្សែភាពយន្តខាងលើនេះ បានថតកាលពីអំឡុងឆ្នាំ ២០២២ និង បានដាក់បញ្ចាំងកាលពីដើមឆ្នាំ ២០២៣ ដោយ កញ្ញា សំ ថារ័ត្ន បានចូលរួមសម្តែងជាមួយនឹងកំពូលតារាហូលីវូដលោក Josh Duhamel និង តារាចម្រៀងល្បីឈ្មោះ Jennifer Lopez។ មិនត្រឹមតែប៉ុណ្ណោះ នាងក៏បានចូលរួមសម្តែងខ្សែភាពយន្តបរទេសមួយចំនួនទៀតដែរ។

៥. កញ្ញា ថន លក្ខិណា

បើរំឭកទៅអតីតកាល កញ្ញា ថន លក្ខិណា ក៏ធ្លាប់បានចូលរួមសម្តែងខ្សែភាពយន្តរបស់ប្រទេសថៃផងដែរ ដោយពិធីការិនីល្បីឈ្មោះរូបនេះ បានបង្ហាញវត្តមានាក្នុងរឿង «The Return» របស់ទូរទស្សន៍ប៉ុថៃស្តិ៍លេខ ៧។ រឿងនេះ បានចាក់បញ្ចាំងកាលពីអំឡុងឆ្នាំ ២០១៤ និង មានការចូលរួមសម្តែងដោយតារាប្រុសលោក Om Akkaphan។

៦. កញ្ញា យ៉ែម ស្រីពេជ្រ

កាលពីពាក់កណ្តាលឆ្នាំ ២០២២ កន្លងទៅ តារាសម្តែងស្រស់សោភា កញ្ញា យ៉ែម ស្រីពេជ្រ បានឆក់បានឱកាសសម្តែងក្នុងខ្សែភាពយន្តភាគបុរាណរបស់ប្រទេសថៃរឿង «พระร่วง พระราชาผู้ทรงธรรม (ព្រះរួង ព្រះរាជាភូទ្រង់ធម្ម)» របស់ក្រុមហ៊ុនផលិតកម្ម The Win Organizer Company Limited។ ភាពយន្តបុរាណនេះដែរ កញ្ញា យ៉ែម ស្រីពេជ្រ បានសម្តែងប៉ះនឹងតារាប្រុសថៃល្បីឈ្មោះ លោក Toey Pongsakorn៕