បង្ហាញឈុតជាស្នាដៃលោក ពេជ្រ ភិរុណ កាលជំនាន់ឆ្នាំ ២០០០ គ្រងដោយអ្នកនាង អម្ពរ ទេវី ទទួលបានពានលេខ ១

បើនិយាយដល់ឈ្មោះ អ្នកនាង អម្ពរ ទេវី ជឿជាក់ថា ប្រិយមិត្តច្បាស់ជានឹកឃើញមុនគេដល់ទម្រង់មុខដ៏ស្រស់ផូរផង់ កែវភ្នែកមូលក្រឡង់ រូបរាងតូចច្រឡឹង និង កាយវិការដ៏ល្វត់ល្វន់របស់អ្នកនាងមិនខាន ដោយអ្នកនាងគឺជាកំពូលតារាភាពយន្តស្រីដ៏ល្បីល្បាញខ្លាំងមួយរូបតាំងពីជំនាន់ឆ្នាំ ១៩៩០ ជាងមកម្ល៉េះ។

អ្នកនាង អម្ពរ ទេវី បានរៀបការជាមួយ លោក ពេជ្រ ភិរុណ នៅឆ្នាំ ១៩៩២ ដែលជាអ្នកសិល្បៈដូចគ្នា ហើយពាក្យថាសំណាបយោងដីស្រីយោងប្រុសរបស់អតីតប្ដីប្រពន្ធអ្នកសិល្បៈមួយគូនេះ បានរុញច្រានឱ្យអ្នកនាង អម្ពរ ទេវី កាន់តែជោគជ័យខ្លាំងលើវិស័យសម្ដែងភាពយន្ត និង ចម្រៀងកាយវិការឱ្យមានកេរ្ដិ៍ឈ្មោះបោះសំឡេងថែមមួយកម្រិតទៀត។

គេចាំបានថា មានព្រឹត្តិការណ៍មួយនៅថ្ងៃឆ្លងសហស្សវត្សរ៍ឆ្នាំ ២០០០ ដែលរៀបចំដោយប៉ុស្ដិ៍ទូរទស្សន៍លេខ ៣ លើទីធ្លាដីក្រហម សួនច្បារផ្សារចាស់ កាលនោះអ្នកនាង អម្ពរ ទេវី ទទួលបានពានរង្វាន់ និង ជ័យលាភីលេខ ១ ក្នុងការប្រកួតម៉ូដសក់ និង សម្លៀកបំពាក់។

ឈុតឈ្មោះ «រាជិនីក្ងោក» ដែលធ្វើឱ្យអ្នកនាង អម្ពរ ទេវី ទទួលបានពានរង្វាន់លេខ ១ នេះ គឺជាការច្នៃ និង កាត់ដេរឡើងយ៉ាងសម្រិតសម្រាំងបំផុតដោយអតីតស្វាមីរបស់អ្នកនាងផ្ទាល់ គឺលោក ពេជ្រ ភិរុណ ដែលលោកបានទទួលមរណភាពកាលពីថ្ងៃទី ២៦ ខែវិច្ឆិកា ឆ្នាំ ២០២៣ កន្លងទៅហើយ ប៉ុន្ដែកេរ្ដិ៍ឈ្មោះ និង ស្នាដៃរបស់លោក នៅតែមានការចែករំលែកដល់មហាជនជំនាន់ក្រោយ៕