មិននឹកស្មាន! ចេញត្រឹម Trailer រឿង «Snow White» មានអ្នកចុចមិនចូលចិត្តជាង ១ លាននាក់លើ Youtube
Trailer ដំបូងនៃរឿង «Snow White» ដែលក្រុមហ៊ុន Disney ផលិតឡើងវិញបែបមនុស្សពិតៗ ថ្មីៗនេះធ្វើឱ្យមហាជនអ្នកវិស័យភាពយន្តជាច្រើនផ្ទុះការចាប់អារម្មណ៍ខ្លាំង ដោយសារតែរឿងថ្មីមួយនេះមិនទាន់បានចាក់បញ្ចាំងជាផ្លូវការផង តែទទួលបានការរិះគន់មិនពេញចិត្តខ្លាំងទៅហើយ។
តាមរយៈវីដេអូ Trailer នៃរឿងថ្មីនេះដែលបង្ហោះបញ្ចេញជាផ្លូវការនៅលើបណ្ដាញសង្គម Youtube កាលពីថ្ងៃទី ០៩ ខែសីហា ឆ្នាំ ២០២៤ កន្លងទៅ សង្កេតឃើញថាចំនួននៃអ្នកចូលចិត្ត និង អ្នកមិនចូលចិត្តរឿងថ្មីមួយនេះគឺមានគម្លាតខុសគ្នាខ្លាំង។ ជាក់ស្ដែង ចំនួនអ្នកចូលចិត្ត (likes) គឺមានត្រឹម ៨១០០០ នាក់ប៉ុណ្ណោះ ខណៈអ្នកចុចមិនចូលចិត្ត (dislikes) មានរហូតដល់ ១ លាននាក់។
គួរឱ្យដឹងថា រឿងលំនាំតុក្កតា «Snow White» នេះដែរ តាំងពីប្រកាសតួអង្គរហូតដល់ចេញជា Trailer គឺទទួលរងការមិនពេញចិត្តជាខ្លាំងពីមហាជនទៅហើយ ដោយមហាជនរៀបរាប់លើកឡើងថាតួអង្គ Snow White គួរតែជានារីដែលមានសម្បុរសស្អាតដូចព្រិល។ គួរបញ្ជាក់ថា ភាពយន្តមួយនេះមានតារាសម្ដែង Rachel Zegler ជាតួអង្គស្រី និង តារាសម្ដែង Gal Gadot ជាតួអង្គ Evil Queen។ រឿងនេះដែរគ្រោងនឹងចាក់បញ្ចាំងជាផ្លូវការនៅក្នុងខែមីនា ឆ្នាំ ២០២៥ ខាងមុខនេះ៕
ប្រភព៖ 9GAG
