អបអរសាទរ! កីឡាការិនីមេដាយមាសស៊ីហ្គេម ខាត់ ចេសា ដឹកដៃគូដណ្ដឹងរូបសង្ហារៀបការយ៉ាងរូម៉ែនទិក នៅអាមេរិក

ចំពោះកីឡាការិនីខ្មែរ-អាមេរិក ខាន់ ចេសា ក្រៅពីធ្វើឱ្យមហាជនអ្នកគាំទ្រកម្ពុជាចាប់អារម្មណ៍ និង មានមោទកភាពជាមួយនឹងការសាងកេរ្តិ៍ឈ្មោះយ៉ាងល្បីល្បាញលើឆាកអន្តរជាតិ កីឡាការិនីរូបនេះ ក៏ត្រូវបានមហាជនចាប់អារម្មណ៍ពាក់ព័ន្ធនឹងជីវិតឯកជនរបស់នាងដែរ។

បើចាប់អារម្មណ៍ពីរឿងរ៉ាវស្នេហាវិញ កីឡាការិនីជឺជីតស៊ូ No-Gi ដ៏ល្បី ខាន់ ចេសា កន្លងមកនាងក៏តែងបង្ហាញពីរឿងស្នេហាតាមរយៈបណ្ដាញសង្គម IG បានឱ្យដឹងថានាងមានម្ចាស់បេះដូងរួចហើយ ដែលជាបុរសសង្ហាម្នាក់ ក៏ជាកីឡាករជឺជីតស៊ូ No-Gi ខ្សែក្រវ៉ាត់ខ្មៅដូចរូបនាងដែរ មានឈ្មោះថា Zachary Kaimaálili Kaina-Kokubun។

លើសពីនេះ កាលពីចុងឆ្នាំ ២០២៣ កន្លងទៅ ខាន់ ចេសា ក៏ត្រូវបានគូស្នេហ៍រូបសង្ហាលុតជង្គង់សុំរៀបការ និង បញ្ជាក់ឱ្យដឹងថាអ្នកទាំងពីរបានភ្ជាប់ពាក្យជាមួយគ្នារួចហើយផងដែរ។

ដោយឡែក មកដល់ថ្ងៃទី ៤ ខែសីហា ឆ្នាំ ២០២៤ កន្លងទៅនេះ កីឡាការិនី ខាន់ ចេសា និង គូដណ្ដឹង ក៏បានសម្រេចដឹកដៃគ្នារៀបការហើយ ដែលបានរៀបចំពិធីមង្គលមួយយ៉ាងរ៉ូមែនទិចជាមួយក្រុមគ្រួសារលើទឹកដីសហរដ្ឋអាមេរិកពេញដោយស្នាមញញឹម និង មានសុភមង្គល៕