ស្មានមិនដល់ថា ពេជ្រ សោភា គឺជាអ្នកគាំទ្រតារាស្រីថៃជើងចាស់រូបនេះសោះ

អាចនិយាយបានថា ជារឿងធម្មតាសម្រាប់អ្នកសិល្បៈ ទោះបីជានៅក្នុងស្រុក ពួកគេមានឈ្មោះល្បីល្បាញខ្លាំងប៉ុនណាក៏ដោយ ក៏ភាគច្រើនពួកគេតែងតែមាន Idol គឺជាអ្នកសិល្បៈដូចគ្នា ដោយកន្លងមកគេឃើញសិល្បករច្រើនមកហើយ ដែលបើកបង្ហាញពីក្ដីស្រឡាញ់ និង ការគាំទ្រទៅកាន់សិល្បកររៀមច្បងដទៃទៀត មិនថា Idol ក្នុងស្រុក ឬក្រៅប្រទេសនោះទេ។

បើងាកទៅចាប់អារម្មណ៍ពីអ្នកនាង ពេជ្រ សោភា វិញ នៅក្នុងប្រទេសអ្នកនាងគឺជាកំពូលតារាចម្រៀងស្រីដ៏ល្បីល្បាញ មានមហាជនស្រឡាញ់ចូលចិត្តច្រើន ហើយក៏ជា Idol ក្នុងដួងចិត្តរបស់សិល្បៈករក្នុងប្រទេសមួយចំនួនដែរ ប៉ុន្ដែទន្ទឹមនឹងនោះ អ្នកនាងក៏មានសិល្បករក្នុងដួងចិត្ត ដែលស្រឡាញ់គាំទ្រដូចគ្នា។

ជាក់ស្ដែងថ្មីៗនេះ ម្ចាស់បទ «អូនទៅហើយ» បានឆ្លងឆ្លើយខំមិនជាមួយពិធីករ សុខ សិរីវឌ្ឍនា បានឱ្យដឹងថា ពេជ្រ សោភា ក៏ជាអ្នកគាំទ្រតារាសម្ដែង Anne Thongprasom ម្នាក់ដែរ ដែលតារាស្រីថៃរូបនេះ បច្ចុប្បន្នគឺជាសិល្បការិនីរៀមច្បងដែលមានបទពិសោធជាង ២០ ឆ្នាំមកហើយនៅក្នុងវិស័យសិល្បៈ ហើយនាងមិនត្រឹមតែជាតារាសម្ដែងដ៏មានកេរ្ដិ៍ឈ្មោះល្បីក្នុងប្រទេសទេ តែនៅក្រៅប្រទេស តារាស្រីរូបនេះក៏ត្រូវបានគេស្គាល់មិនធម្មតាដែរ ហើយច្រើនឆ្នាំមកនេះ Anne ក៏ជាអ្នកដឹកនាំរឿងដ៏ឆ្នើមមួយរូប៕