គាប់ជួន! មិត្តប្រុសថ្មី Bella មានឈ្មោះស្រដៀងនឹងសង្សារចាស់ ឯប្រវត្តិសិក្សា និង ការងារវិញគឺមិនធម្មតា
បន្ទាប់ពីទុកបេះដូងឱ្យនៅទំនេរជិត ២ ឆ្នាំមក ថ្មីៗនេះ តារាស្រីរូបស្រស់ Bella ដាច់ចិត្តទម្លាយពីមុខមាត់គូស្នេហ៍វ័យក្មេងរបស់នាងហើយ ពោលគឺ ឈ្មោះថា Will ត្រូវបានមហាជនស្គាល់ថា ជាកូនប្រុសថៅកែ CP ផងដែរ។
យ៉ាងណាមិញ ក្រោយបើកចំហចំណងស្នេហ៍ជាផ្លូវការថា នាង និង Will កំពុងតែទាក់ទងគ្នាហើយ សម្រាប់មហាជនក៏លែងទទូចចង់ដឹងទៀតដែរ គ្រាន់តែម្នាក់ៗលាន់មាត់ព្រាតថា វាហាក់គាប់ជួនណាស់សម្រាប់ Bella ព្រោះថា សង្សារចាស់របស់នាង មានឈ្មោះថា Weir ដល់ពេលបានសង្សារថ្មីឈ្មោះ Will ស្រដៀងគ្នាទៀត។
ទោះយ៉ាងណា មិនអាចរំឭករឿងចាស់បានទេ សំខាន់ពេលនេះ Bella មានអ្នកស្អំបេះដូងហើយ មិនត្រឹមតែរូបសម្រស់សមគ្នានោះទេ តែបើក្រឡែកទៅមើលប្រវត្តិខាងប្រុសវិញនោះក៏មិនធម្មតាដែរ ពោលគឺតាមការស៊ើបប្រវត្តិមកថា កូនប្រុសថៅកែ CP រូបនេះឈ្មោះ Will Chawin រៀនចប់ពី Kenan-Flagler Business School នៃសកលវិទ្យាល័យ University of North Carolina at Chapel Hill ផ្នែកសេដ្ឋកិច្ច និង គ្រប់គ្រង។
ដោយឡែក បន្ទាប់ពីវ័យផ្តើមចូលអាយុ ២២ ក្នុងឆ្នាំ ២០១៤ លោក Will Chawin បានបង្កើតក្រុមហ៊ុនមួយឈ្មោះ 2W Group ក្រោយមកឆ្នាំ ២០១៨ កំលោះសង្ហារូបនេះបានបង្កើតអាជីវកម្មគ្រប់គ្រងមូលនិធិមួយទៀតឈ្មោះ Private Equity ដែលផ្តោតលើការបណ្តាក់ទុនមួយទៀតផងដែរ៕
