ភរិយា S Kantapong ប្រាប់ពីស្ថានភាពជំងឺចុងក្រោយរបស់ស្វាមី ក្រោយសន្លប់បាត់ស្មារតីលើគ្រែពេទ្យអស់ ១៧ ថ្ងៃ

ជាងកន្លះខែទៅហើយ ដែលតារាប្រុស S Kantapong បានសន្លប់បាត់បង់ស្មារតីគេនៅលើគ្រែពេទ្យយ៉ាងគួរឱ្យអាណិត និង ទទួលបានការយកចិត្តទុកដាក់យ៉ាងខ្លាំងពីក្រុមគ្រូពេទ្យនោះ ព្រោះចាប់តាំងពីថ្ងៃសន្លប់បាត់បង់ស្មារតីមកស្ថានភាព S Kantapong ហាក់មិនប្រើសើរឡើងទាល់តែសោះ រហូតភរិយា និង អ្នកគាំទ្ររបស់តារាប្រុសរូបនេះបង្ហោះសារជូនពរ និង បួងសួងស្ទើរគ្រប់គ្នា។

ក្រោយមហាជនបង្ហោះសារបួងសួងបន់ស្រន់ឱ្យ S Kantapong ឆាប់ដឹងខ្លួន ស្រាប់តែថ្មីៗនេះ ភរិយាតារាប្រុសរូបនេះបានទម្លាយដំណឹងល្អទាក់ទងនឹងស្វាមីឱ្យមហាជនបានជ្រាប និង សប្បាយចិត្តខ្លះហើយ។

ក្នុងនោះ នាងបានទម្លាយថា ពេលនេះស្វាមីរបស់នាងបានដឹងខ្លួន និង ចាប់ផ្តើមកម្រើកម្រាមដៃហើយ ទាំងដែលមកដល់ពេទ្យពីដំបូង បេះដូងស្វាមីរបស់នាងគាំងឈប់លោត ៥ នាទីឯណោះ តែសំណាងល្អគ្រូពេទ្យជួយសង្រ្គោះទាន់ធ្វើឱ្យបេះដូងត្រឡប់មានចលនាវិញ ហើយពេលនេះបើទោះបីជាដឹងខ្លួនក៏ដោយតែនៅពុំទាន់អាចនិយាយបាននោះទេ ពោលគឺស្ថិតនៅក្នុងការមើលថែយ៉ាងយកចិត្តទុកដាកពីក្រុមគ្រូពេទ្យជំនាញបន្ថែមទៀត៕