អតីតភរិយា លោក Tim Pita ឆ្លើយតបគ្មានលាក់ ក្រោយអ្នកគាំទ្រសង្ស័យថានាងអាចនឹងវិលមកទាក់ទងគ្នាម្តងទៀត

Tye Chutima មិនត្រឹមតែមានសម្រស់ស្រស់ស្អាតនោះទេ តែនាងក៏ជាតារាស្រីម្នាក់ដែលមានកេរ្តិ៍ឈ្មោះនៅក្នុងសិល្បៈថៃដែរ។ អ្វីដែលសំខាន់ បើទោះបីជានាងធ្លាប់រៀបការមានកូនហើយក៏ដោយ តែបើគន់ទៅមើលសម្រស់របស់នាងវិញនៅក្មេងមិនចាញ់យុវវ័យឡើយ។

បើក្រឡែកទៅមើលពីជីវិតឯកជនរបស់តារាស្រី Tye Chutima ក្រោយលែងលះជាមួយ Tim Pita វិញ ឃើញនាង និង អតីតស្វាមីមិនបានចងសត្រូវជាមួយគ្នាឡើយ ពោលគឺនៅបំពេញតួនាទីជាម្តាយឪពុកល្អចំពោះកូនជានិច្ច។

ដោយឡែក ថ្មីៗនេះ Tye Chutima ធ្លាប់បង្ហើបថា នាងនឹងរៀបការម្តងទៀតជាមួយមនុស្សម្នាក់ ដែលមហាជនសង្ស័យថាអាចជាអតីតស្វាមី។ ទោះយ៉ាងណា ទន្ទឹមនឹងមហាជនសង្ស័យនេះដែរ ពេលនេះ Tye Chutima បានទម្លាយការពិតគ្រប់យ៉ាងហើយ។

ក្នុងនោះនាងបានបញ្ជាក់ច្បាស់ៗថា ពេលនេះនាង និង អតីតស្វាមីជាគ្រួសារនឹងគ្នាស្រាប់ហើយ ជាគ្រួសារដែលបំពេញភាពកក់ក្តៅឱ្យកូន រហូតកូនរបស់នាងរៀនចប់ មានគ្រួសារ ហើយសម្រាប់ទំនាក់ទំនងពេលនេះនាងចាត់ទុកអតីតស្វាមីជា Idol តែប៉ុណ្ណោះ ហើយក៏នៅតែលើកទឹកចិត្តដល់អតីតស្វាមីដូចដើមដែរ៕