អីយ៉ាស់! ទីបំផុត Chansung ក្រុម 2PM ព្រមទម្លាយភិនភាគកូនស្រីហើយ ក្រោយនាងតូចអាយុជិត ២ ឆ្នាំ

Chansung សមាជិកក្នុងក្រុមចម្រៀងបុរសកូរ៉េ 2PM ហើយក៏ជាតារាសម្ដែងមួយរូប បានទទូលបានតំណក់ឈាមជាលើកដំបូងជាកូនស្រី កាលពីខែកក្កដា ឆ្នាំ ២០២១ កន្លងទៅ ក្រោយលោកប្រកាសរៀបការជាមួយនឹងមិត្តស្រីរបស់ខ្លួនកាលពីខែធ្នូ ឆ្នាំ ២០២១។

យ៉ាងណាមិញ ថ្មីៗនេះ Chansung បានចូលរួមក្នុងកិច្ចសម្ភាសតុមូលជាមួយសារព័ត៌មានមួយ ព្រមទាំងបានបើកចំហអំពីជីវិតរបស់លោកជាតារាសម្តែង ជាតន្ត្រីករ និង កាតាព្វកិច្ចលោកជាឪពុកនៅផ្ទះមួយរូប។

ជាក់ស្ដែង នៅក្នុងបទសម្ភាសនោះគេបានសួរទៅដល់កូនស្រីរបស់លោកផងដែរ បន្ទាប់មកលោកក៏បានប្រាប់ទៅវិញថា ៖ «មុខមាត់របស់នាង មើលទៅគឺដូចខ្ញុំអ៊ីចឹង»។ លោកក៏បានបន្ថែមទៀតពីទំនួលខុសត្រូវរបស់លោកក្នុងនាមជាឳពុកគេមួយរូបថា ៖ «ឥឡូវនេះលោកជាមេគ្រួសារ លោកមានអម្រែកដ៏ធំមួយនៅលើស្មា នៅពេលដែលលោកសម្រេចចិត្តអ្វីមួយម្ដងៗ ហើយលោកព្រមទទួលការពិតទាំងអស់ ព្រោះឥឡូវលោកមិនអាចរស់ស្រួលតែម្នាក់ឯងបានឡើយ»។

Chansung បន្ថែមទៀតថា ៖​ «ដោយសារតែលោកសង្ឃឹមថានៅពេលដែលកូនស្រីរបស់ខ្លួនបានចូលរៀន នាងនឹងមានមោទនភាពចំពោះលោក ហើយមានអារម្មណ៍កក់ក្ដៅពេលនៅក្បែរលោក ហើយពេលនាងធំឡើង»៕