ក្លាយជាប្តីប្រពន្ធជាង ២ ឆ្នាំ ឈិន សុធារី ជិតបានឃើញមុខទាយាទដំបូងជាតំណក់ឈាមស្វាមីឧកញ៉ាហើយ

បើគិតមកដល់ពេលនេះរយៈពេលប្រមាណជាជាង ២ ឆ្នាំ មកហើយ ដែលអតីតតារាចម្រៀង ឈិន សុធារី បានចាប់ដៃគ្នានឹងគូស្នេហ៍ថ្មីសាងចំណងសុភមង្គលរស់នៅក្នុងនាមជាប្តីប្រពន្ធ ក្រោយពីស្ពាយឈ្មោះជាម៉េម៉ាយអស់រយៈពេល ៣ ឆ្នាំ មក។

ក្នុងនោះ ក្រោយពីចាប់ដៃគ្នានឹងគូស្នេហ៍ថ្មី ជាឧកញ៉ាវ័យក្មេង ព្រមទាំងបើកចំហជាប្តីប្រពន្ធហើយនោះ អតីតតារាចម្រៀងខាងលើទទួលបានងារជាជំទាវ ព្រមទាំងមានមុខជំនួញពេញដៃ និង រស់នៅយ៉ាងមានសុមង្គលជាមួយនឹងស្វាមីទៀតផង ។

ជារឿយៗមហាជនបានឃើញជំទាវ ឈិន សុធារី រមែងបង្ហាញសកម្មភាពការងារជាច្រើនក្នុងសង្គម ព្រមទាំងលើមុខជំនួយការរកស៊ីផ្សេងៗ តែមួយរយៈចុងក្រោយមហាជនក៏ហាក់មានក្តីរឭកដែរ ដោយជំទាវ ឈិន សុធារី មិនសូវបានបង្ហាញរូបភាពថ្មីៗរបស់ខ្លួនទេ ដោយធ្វើឱ្យមហាជនលើកឡើងថា ជំទាវ ឈិន សុធារី អាចនឹងមមាញឹករឿងការងារ ឬ ជីវិតផ្ទាល់ខ្លួន។

យ៉ាងណាអ្វី ថ្មីៗនេះមានផេកផ្លូវការរបស់ហាងលក់ទឹកត្រចៀកកាំមួយ បានបង្ហោះរូបភាពរបស់ជំទាវ ឈិន សុធារី ដែលមើលទៅកំពុងពពោះទាយាទក្រោយ ធ្វើឱ្យមហាជនមានការចាប់អារម្មណ៍យ៉ាងខ្លាំង។ លើសពីនោះ អ្វីដែលកាន់តែច្បាស់ជំទាវ ឈិន សុធារី ក៏បានចូលទៅបញ្ចេញមតិខាងក្រោមរូបភាពនោះ បញ្ជាក់ច្បាស់ៗថាខ្លួនកំពុងមានផ្ទៃពោះមែន។

ជាការពិត ជំទាវ ឈិន សុធារី ធ្លាប់បានបង្ហោះរូបភាពពពោះកន្លងមកហើយដែរ តែមហាជនអាចនឹងមិនបានចាប់ភ្លឹក ក៏ព្រោះតែអតីតតារាចម្រៀងខាងលើបានផ្អាកបង្ហោះរូបភាពផ្ទាល់ខ្លួនមួយរយៈដែរ។ តែក្រោយពីឃើញបែបនេះ មហាជនអ្នកគាំទ្រអតីតតារាចម្រៀង និង ពិធីការិនីដ៏ល្បីឈ្មោះ ឈិន សុធារី ក៏បានចូលរួមអបអរសាទ ដល់ជំទាវ និង ស្វាមី ជាឧកញ៉ា ដែលទទួលបានទាយាទជាចំណងស្នេហ៍ នឹងត្រៀមទទួលស្វាគមន៍ក្នុងពេលឆាប់ៗខាងមុខនេះ៕