ក្ដៅស្លឹកត្រចៀកទាំងព្រឹក! ពេជ្រ សូលីកា ត្រូវជនអនាមិកលួចបទចម្រៀងខំនិពន្ធ ទៅបង្ហោះគ្មានក្រែងចិត្ត

នាព្រឹកថ្ងៃទី ២៥ ខែមករា ឆ្នាំ ២០២៣ តារាចម្រៀងស្រី ពេជ្រ សូលីកា បានធ្វើឱ្យមហាជនអ្នកគាំទ្រជាច្រើនភ្ញាក់ផ្អើលទាំងព្រលឹម ដោយអ្នកនាងបានបង្ហោះសារមួយក្នុងគណនីហ្វេសប៊ុកផេកថា បទចម្រៀងមួយដែលជាញើសឈាមរបស់ខ្លួនបានបែកធ្លាយ ដោយត្រូវបានជនអនាមិកយកលួចទៅបង្ហោះចែកចាយ។

ក្នុងសារដែល សូលីកា បានបង្ហោះនោះ នាងបានរៀបរាប់យ៉ាងក្ដៅស្លឹកត្រចៀកថា ៖ «បទ «មានអ្នកត្រូវការខ្ញុំទេ» ត្រូវបានជនអនាមិក លួចបង្ហោះចែកចាយជាសាធារណៈ។ ខ្ញុំមិនលើកលែងឱ្យទេ ព្រោះវាជាញើសឈាមរបស់ខ្ញុំ»។ មិនតែប៉ុណ្ណោះ តារាស្រីស្រស់រូបនេះបានបន្ថែមទៀតថា ៖ «អាពួកវាខូច កុំឱ្យវាដេកស្រួលឱ្យសោះ»។

យ៉ាងណាមិញ នេះមិនមែនជាលើកទី ១ ឡើយដែលបទចម្រៀងរបស់សិល្បករសិល្បការិនី ត្រូវបានជនខិលខូចធ្វើឱ្យបែកធ្លាយ។ ក្នុងនោះផងដែរ មហាជនអ្នកគាំទ្ររបស់អ្នកនាងក៏បានចូលទៅបញ្ចេញមតិលើកទឹកចិត្ត ព្រមទាំងជំរុញឱ្យនាងឆាប់ចាត់ការជនទាំងនោះតាមផ្លូវច្បាប់ កុំឱ្យពួកគេទាំងនោះរួចខ្លួនឱ្យសោះ៕