Rain តបវិញមួយទំហឹង ក្រោយគ្រូទាយម្នាក់ថា ឆ្នាំនេះលោក និង ភរិយា នឹងមានកូនម្នាក់ទៀត
ជីវិតក្រុមគ្រួសាររបស់តារាសម្ដែងកូរ៉េដ៏ល្បីលោក Rain និង អ្នកនាង Kim Tae Hee ព្រមទាំងព្រះនាងតូចទាំង ២ របស់ពួកគេ តែងតែក្លាយជាប្រធានបទដ៏គួរឱ្យចាប់អារម្មណ៍សម្រាប់អ្នកគាំទ្រ និង អ្នកនិយមលេងអ៊ីនធើណេត ដើម្បីតាមដានជជីកគាស់កាយយកមកនិយាយជាប់ជានិច្ច។
យ៉ាងណាមិញ កាលពីថ្ងៃទី ១៩ ខែមករា ឆ្នាំ ២០២៣ កន្លងទៅ គណនី YouTube ផ្លូវការ Season B Season បានចេញឃ្លីបវីដេអូមួយ ដែល Rain បានទៅជួបគ្រូទាយជនជាតិកូរ៉េមួយរូប។ ជាមួយគ្នានោះគ្រូទាយបានប្រាប់ស្វាមីសំណព្វរបស់អ្នកនាង Kim Tae He ថា លោក និង ភរិយានឹងមានឱកាសបានកូនប្រុសម្នាក់ទៀតក្នុងឆ្នាំនេះ។
នេះគឺជាដំណឹងមួយដ៏គួរឱ្យភ្ញាក់ផ្អើល និង រីករាយជាខ្លាំងសម្រាប់អ្នកគាំទ្ររបស់ពួកគេ ដោយឡែកលោក Rain ម្ចាស់សាមីខ្លួនឯណោះវិញ គ្រាន់តែឮបែបនេះហើយ លោកស្រឡាំងកាំង ព្រមទាំងតបទៅវិញថា ៖ «ពេលនេះខ្ញុំមានកូនពីរនាក់ហើយ! និយាយដោយស្មោះត្រង់ចុះ ខ្ញុំមិនមានគម្រោងយកកូនទៀតទេ» ប៉ុន្តែគ្រូទាយបានបញ្ជាក់ប្រាប់ទៀតថា ឱកាសលោកមានកូនគឺមានច្រើនណាស់៕
