ស្ញប់ស្ញែងណាស់! កូនខ្មែរ ៤ រូប ចេញមុខបង្ហាញសមត្ថភាពក្នុងខ្សែភាពយន្តល្បីៗលំដាប់ពិភពលោក
ពិតជារឿងគួរឱ្យមោទកណាស់ ដែលកូនខ្មែរ និង កូនកាត់ខ្មែរយើងចំនួន ០៤ រូប បានចេញមុខបង្ហាញសមត្ថភាពរបស់ខ្លួននៅក្នុងខ្សែភាពយន្តល្បីៗលំដាប់ពិភពលោក ដែលជារឿងដ៏គួរឱ្យស្ញប់ស្ញែងបំផុត។ ជាក់ស្ដែង កូនខ្មែរទាំងនោះមានដូចជា ៖
១. លោក Daren Nop
លោក Daren Nop គឺជាតារា Stunt ជនជាតិខ្មែរសញ្ជាតិបារាំង ដែលបានបង្ហាញសមត្ថភាពក្នុងរឿងហូលីវូដល្បីៗ មានដូចជា រឿង «Moon Knight», រឿង «John Wick: Chapter 4», រឿង «The King’s Man», រឿង «Black Widow» និង រឿងជាច្រើនទៀត។
២. លោក ហ្សង់ប៉ូល លី
លោក ហ្សង់ប៉ូល លី បានសម្ដែងជាតួ Stunt នៅក្នុងរឿងល្បីៗដែលមានដូចជា រឿង «Doctor Strange in the Multiverse of Madness», រឿង «The Batman», រឿង «Venom», រឿង «F9 the Fast saga» និង រឿងជាច្រើនទៀត។
៣. លោក ឌី សៅ
លោក ឌី សៅ ជាកូនខ្មែរមានដើមកំណើតនៅឯខេត្តបាត់ដំបង បានធ្វើការជាមួយតារាសម្ដែង Jet Li និង Jackie Chan ហើយក៏បានជួបជាមួយលោកគ្រូបង្វឹកក្បាច់គុនសៅលីងល្បីបំផុតនៅចិនលោក Wu Bin ដែលជាគ្រូបង្វឹករបស់តារាសម្ដែង Jet Li ផ្ទាល់ ហើយលោកក៏ក្លាយជាកូនសិស្សរបស់គាត់។
លោក ឌី សៅ បានបោះជំហានចូលវិស័យហូលីវូដក្នុងតួនាទីជាតួអង្គ Stunt និង ជាគ្រូបង្រៀនគុនខ្មែរ ប្រដាល់សេរី និង កុងហ្វូ ដល់តួអង្គសំខាន់ផ្សេងៗ ជាពិសេសតួដែលត្រូវសម្ដែងភាពយន្ដប្រភេទ Action វាយប្រហារ និង ប្រើក្បាច់គុន ជាដើម។ លោកក៏ជាគ្រូបង្វឹករបស់តារាប្រុស Simu Liu ដែលជាតួឯកប្រុសក្នុងរឿង «Shang Chi and the Legend of the Ten Rings» របស់ក្រុមហ៊ុន Marvel ផងដែរ។
៤. កញ្ញា សំ ថារ័ត្ន
កីឡាការិនីគុនល្បុក្កតោ សំ ថារ័ត្ន ធ្លាប់បានបង្ហាញវត្តមាននៅក្នុងខ្សែភាពយន្តខ្នាតធំមួយចំនួនមកហើយដូចជា រឿង «Jailbreak» និង រឿង «First They Kill My Father» ដោយកញ្ញាបានសម្តែងជាតួអង្គវាយតប់ផងដែរ។
ទន្ទឹមនោះ កញ្ញា សំ ថារ័ត្ន ក៏បានឈានជើងចូលទៅក្នុងខ្សែភាពយន្តហូលីវូដរឿង «SHOTGUN WEDDING» ដែលសហការសម្តែងជាមួយតារាសម្តែងហូលីវូដល្បីៗ ជាច្រើនដូចកំពូលតារាស្រី Jennifer Lopez លោក Armie Hammer និង លោក Josh Duhamel ជាដើម៕
