ជូនពរម្នាក់មួយម៉ាត់មក! ហ៊ាប ស៊ាងហ៊ុយ Mister Friendship Cambodia ចេញដំណើរទៅប្រកួតនៅប្រទេសថៃហើយ
បន្ទាប់ពីបានតំណែងជាជ័យលាភី Mister Friendship Cambodia ២០២២ ហើយ លោកគ្រូពេទ្យរូបសង្ហា ហ៊ាប ស៊ាងហ៊ុយ នឹងត្រូវតំណាងឱ្យកម្ពុជាចូលរួមប្រកួត Mister Friendship International ដែលនឹងប្រព្រឹត្តិនៅថ្ងៃទី ០៨ ខែធ្នូ ឆ្នាំ ២០២២ ដល់ ថ្ងៃទី ១៩ ខែធ្នូ ២០២២ នៅខេត្តខនកែន ប្រទេសថៃ។
យ៉ាងណាមិញ កាលពីល្ងាចថ្ងៃទី ០៦ ខែធ្នូ ឆ្នាំ ២០២២ កន្លងទៅ បុរសឯករូបនេះក៏បានចាកចេញពីប្រទេសកម្ពុជាឆ្ពោះទៅខេត្តខនកែន ដើម្បីត្រៀមចូលរួមប្រកួតហើយ។ ទន្ទឹមនឹងការចាកចេញនេះ លោក ហ៊ាប ស៊ាងហ៊ុយ បានបង្ហាញនូវការតាំងចិត្តយ៉ាងមុតមាំ ស្នាមញញឹម ភាពជឿជាក់ និង ទំនុកចិត្ត។
លើសពីនោះ អ្នកកំលោះរូបនេះក៏បានបង្ហោះសារយ៉ាងមានន័យនៅលើគណនីហ្វេសប៊ុកផេករបស់ខ្លួនថា ៖ «លោកនឹងព្យាយាមធ្វើឱ្យអស់ពីកម្លាំងកាយចិត្ត និង នាំយកភាពជោគជ័យវិលមកប្រទេសកម្ពុជាឱ្យបាន»។ ងាកទៅមើលអ្នកគាំទ្រខ្មែរវិញ បន្ទាប់ពីឃើញបុរសឯកកម្ពុជាចេញដំណើរទៅប្រកួតនៅប្រទេសថៃ ម្នាក់ៗបានបញ្ចេញមតិជូនពរព្រោងព្រាតផងដែរ។
គួរបញ្ជាក់ផងដែរថា កម្មវិធីប្រកួតប្រជែង Mister Friendship International នេះ ជាកម្មវិធីមួយដែលផ្តល់ឱកាសឱ្យបណ្ដាបុរសឯកទូទាំងពិភពលោក ចូលរួមបញ្ចេញសមត្ថភាព និង ចំណេះដឹង ព្រមទាំងផ្សព្វផ្សាយវប្បធម៌ អរិយធម៌ប្រទេសរបស់ខ្លួនផងដែរ៕