គ្រាន់តែ Jaonaay បង្ហើបមុខគូស្នេហ៍ថ្មីភ្លាម Junei ចេញមុខបង្ហាញអារម្មណ៍ឡើងភ្លែត
កាលពីពេលថ្មីៗនេះ មហាជនអ្នកគាំទ្រតារាចម្រៀងប្រុសវ័យក្មេង Jaonaay បាននាំគ្នាផ្ទុះការសង្ស័យថា អ្នកកំលោះរូបនេះកំពុងមានទំនាក់ទំនងជាមួយនឹងស្រីស្អាតម្នាក់ក្រៅរង្វង់សិល្បៈថៃ ដែលមានឈ្មោះ Nenepy។ មូលហេតុដែលធ្វើឱ្យអ្នកគាំទ្រសង្ស័យ ព្រោះគេបានឃើញអ្នកកំលោះ Jaonaay និង នារីស្រស់រូបនោះ កាន់ដៃគ្នាទៅធ្វើដំណើរកម្សាន្តស្ងាត់ៗតែពីរនាក់នៅសហរដ្ឋអាមេរិក ថែមទាំងបានបង្ហោះរូបភាពនៅលើ Story អ៊ីនស្ត្រាក្រាមរៀងៗខ្លួនថែមទៀតផង។
ទន្ទឹមនឹងឃើញបែបនេះ មហាជនក៏មានការភ្ញាក់ផ្អើលដែរ ព្រោះកន្លងមកអ្នកគាំទ្របានឃើញតារាប្រុសរូបនេះស្និទ្ធស្នាលជាមួយតារាស្រី Junei ដោយគិតថា តារាស្រី Junei និង Jaonaay ជាសង្សារនឹងគ្នាហើយ តែពេលនេះបែរជាតារាប្រុស Jaonaay ស្និទ្ធជាមួយនឹងនារីផ្សេងទៅវិញ។ ដំបូងឡើយមហាជនហាក់មិនសូវប្រាកដចិត្តឡើយថា តារាប្រុស Jaonaay មានទំនាក់ទំនងជាមួយនឹងនាង Nenepy តែកាលពីថ្ងៃទី ៣០ ខែវិច្ឆិកា ឆ្នាំ ២០២២ កន្លងទៅ បានធ្វើឱ្យមហាជនច្បាស់ ៨០ ភាគរយហើយថា អ្នកទាំងពីរមានទំនាក់ទំនងគ្នាមែន។
ដោយឡែក អ្វីដែលសំខាន់ ក្រោយ Jaonaay បង្ហាញមុខគូស្នេហ៍ថ្មីភ្លាម ស្រាប់តែតារាស្រីរូបស្រស់ Junei បានលេចមុខទម្លាយអារម្មណ៍ក្នុងបទសម្ភាសមួយថា កន្លងមកប្រហែលមហាជនគិតថានាង និង Jaonaay ជាសង្សារនឹងគ្នាហើយ ដោយសារតែនាងទៅណាមកណាជាមួយគ្នារហូត តែការពិតនាង និង Jaonaay ជាមិត្តនឹងគ្នាតែប៉ុណ្ណោះ។
បន្ថែមពីនេះទៀត Junei ក៏បានបន្តទៀតថា គូស្នេហ៍ថ្មីរបស់ Jaonaay ក៏មិនបានស្គាល់នោះដែរ ហើយដំណឹងធ្លាយថា Jaonaay មានគូស្នេហ៍ថ្មីនេះ នាងក៏ទើបតែដឹងដំណាលមហាជនអ្នកគាំទ្រដែរ៕