(វីដេអូ) បង្កើតគណនី Tik Tok ទើបបាន ៤ ថ្ងៃ វណ្ណដា ទទួលបានអ្នក follow ជិត 260K ឯវីដេអូដំបូងមានអ្នកមើល 3.2M
អ្នកគាំទ្រសុទ្ធសឹងតែបានដឹងហើយថា តារាចម្រៀងរ៉េបវ័យក្មេងដ៏ល្បីល្បាញ លោក វណ្ណដា ជាតារាចម្រៀង Original Song មួយរូបមានសមត្ថភាពខ្ពស់ក្នុងវិស័យចម្រៀងទាំងការច្រៀង រ៉េប និពន្ធបទចម្រៀង បទភ្លេង និង បង្កើតស្នាដៃបទចម្រៀងថ្មីៗ ទទួលបានការគាំទ្រខ្លាំងពីមហាជនខ្មែរ ព្រមទាំងល្បីល្បាញសុសសាយដល់ក្រៅប្រទេសទៀតផង។
ក្រឡេកទៅមើលរឿងរ៉ាវជីវិតឯកជនរបស់តារាចម្រៀងរ៉េបរូបនេះវិញ ក៏មានមហាជនជាច្រើនតាមដាន និង ចាប់អារម្មណ៍ផងដែរតាមរយៈសកម្មភាពនានារបស់លោកលើបណ្តាញសង្គមហ្វេសប៊ុក IG និង Youtube ជាដើមនោះ។ ជាក់ស្តែង មិនថាតែវីដេអូ សារជាអក្សរ ឬ រូបភាពរបស់លោក វណ្ណដា ដែលបានបង្ហោះកន្លងមកនោះទេ តែងបានជះឥទ្ធិពលយ៉ាងខ្លាំងដល់អ្នកគាំទ្រ ដោយមានអ្នកចុចចូលចិត្ត ចូលបញ្ចេញមតិ និង ចែករំលែកដល់ខ្ទង់រាប់ម៉ឺននាក់ក៏មាន។
ថ្មីៗនេះ តារាចម្រៀងរ៉េបប្រចាំផលិតកម្មបារមី លោក វណ្ណដា ក៏ទើបតែបង្កើតគណនី Tik Tok ជាលើកដំបូង ធ្វើឱ្យអ្នកគាំទ្រជាច្រើនរីករាយ និង សម្រុកទៅ Follow ដើម្បីតាមដានសកម្មភាពរបស់លោកលើកម្មវិធីកំពុងពេញនិយមខាងលើនោះ ដោយត្រឹមរយៈពេល ៤ ថ្ងៃ លោក វណ្ណដា មានអ្នកគាំទ្រចូលទៅចុច Follow ដល់ទៅជិត 260 K ពោលគឺ 255.6 K ទៅហើយ។ រីឯវីដេអូដំបូង ដែលលោកបានផុស គឺមានអ្នកទស្សនាដល់ទៅ 3.2 M៕
