រតនៈ វិសិដ្ឋ ក្ដៅចិត្តបង្ហោះសារផ្អើលគេឯង រឿងអ្នកយកសមត្ថភាពមនុស្សម្នាក់ មកប្រៀបជាមួយមនុស្សម្នាក់ទៀត

អ្នកគាំទ្រតារាសម្ដែងប្រុសរូបសង្ហា រតនៈ វិសិដ្ឋ កំពុងផ្ទុះការភ្ញាក់ផ្អើល និង ងឿងឆ្ងល់ជាខ្លាំង ខណៈនៅសុខៗ តារាប្រុសសាច់សខ្ចីរូបនេះបង្ហោះសារក្ដៅចិត្តមួយលើហ្វេសប៊ុក រឿងមានអ្នកទាក់ទងការងារ ប៉ុន្ដែយកសមត្ថភាពទៅប្រៀបធៀបនឹងសមត្ថភាពអ្នកដទៃ។

ប្រុសសង្ហា រតនៈ វិសិដ្ឋ បង្ហោះសារបង្ហាញពាក្យក្នុងចិត្តថា ៖ «ស្អប់បំផុតទាក់ទងការងារ ដោយយកមនុស្សម្នាក់ មកប្រៀបជាមួយមនុស្សម្នាក់ទៀត មនុស្សខុសគ្នាសមត្ថភាពខុសគ្នា ហេតុអីយកមកប្រៀបធៀបគ្នា មនុស្សចេះធ្វើការគេអត់និយាយបែបហ្នឹងទេ ខ្ញុំជឿថាអ្នកណាក៏ដូចអ្នកណាដែរ តែយើងយកខ្លួនគេទៅប្រៀបជាមួយអ្នកផ្សេងគេក៏អត់សប្បាយចិត្តជាមួយដែរ ពេលខ្លះក៏អាចធ្វើឱ្យបុគ្គលដែលយើងយកមកប្រៀបធៀបនោះស្អប់គ្នាទៀត យល់ឱ្យច្បាស់តិចទៅ ធ្វើការរៀនឱ្យតម្លៃលើការងាររបស់គេផង ទើបគេគោរពឱ្យតម្លៃអ្នកវិញដូចគ្នា»។

រតនៈ វិសិដ្ឋ មិនបានបញ្ចេញឈ្មោះថាសារដែលលោកបង្ហោះនោះ ចង់សំដៅដល់អ្នកណាឡើយ តែផ្ទុយទៅវិញ តារាប្រុសរូបនេះបែរអះអាងថា លោកបង្ហោះនេះនិយាយទូទៅប៉ុណ្ណោះមិនសំដៅដល់បុគ្គលណាម្នាក់ឡើយ។

ដ្បិតថា រតនៈ វិសិដ្ឋ អះអាងថាសារដែលលោកបង្ហោះនោះគឺសំដៅដល់មនុស្សទូទៅ ប៉ុន្ដែអ្នកគាំទ្រលោក មានការភ្ញាក់ផ្អើលមិនអស់ចិត្ត ព្រោះកន្លងមកគេកម្រឃើញតារាប្រុសរូបសង្ហាខាងលើបង្ហោះសារបែបនេះលើហ្វេសប៊ុកណាស់៕