បាត់មុខច្រើនឆ្នាំ នួន សុផល បុរសសាច់ដុំកង់ៗជំនាន់ឆ្នាំ ៩០-២០០០ នៅតែសង្ហាដដែល
បើនិយាយដល់រឿង «អង្គុលីមាល៍» រឿង «ស្តេចដំរីស» ប្រិយមិត្តប្រាកដជានៅចាំលោក នួន សុផល មិនខាន ដោយលោកបានសម្តែងជាតួឯកបានយ៉ាងស័ក្តិសម។ មិនត្រឹមតែរឿងពីរនេះទេ នៅមានរឿងជាច្រើនទៀតដែលលោកបានចូលរួមសម្តែង និង ទទួលបានការគាំទ្រនាសម័យចុងឆ្នាំ ៩០ និង ដើមឆ្នាំ ២០០០។
ពិតណាស់ រឿងដែលលោក នួន សុផល មានរហស្សនាមថា បុរសសង្ហាសម្បុរស្រអែម សម្បូរសាច់ដមុំកង់ៗ បានចូលរួមសម្តែងនោះ មានដូចជា ៖ រឿង «ស្តេចដំរីស» រឿង «ម៉ាកភូយុងកែវ» រឿង «ចៅស្រទបចេក» រឿង «អង្គុលីមាល៍» រឿង «ព្រះធិនវង្ស» រឿង «តេជោយ៉ត» រឿង «មហាចោរទល់ដែន» រឿង «ក្រមុំចូលម្លប់» រឿង «ទឹកភ្នែកស្រីពេស្យា» និង មានរឿងជាច្រើនទៀត។ ក្នុងនោះដែរលោកក៏ធ្លាប់បានសម្តែងចម្រៀងកាយវិការជាច្រើនបទផងដែរ។
ក្រោយប្រឡូកក្នុងសសិល្បៈបានមួយស្របក់ធំ ពោលគឺតាំងពីឆ្នាំ ១៩៩៧ ដោយប្រមូលបានប្រជាប្រិយភាពបានច្រើនរួចនោះ ស្រាប់តែនៅឆ្នាំ ២០០៤ តារាប្រុសរហស្សនាម បុរសសង្ហាសម្បុរស្រអែម សម្បូរសាច់ដមុំកង់ៗ នួន សុផល ក៏បានលាឈប់ពីអាជីពមុខកាមេរ៉ាវិញយ៉ាងស្ងប់ស្ងាត់ទៅវិញ។
ស្របគ្នានឹងពេលតារាប្រុសសម្បូរសាច់ដុំកង់ៗ នួន សុផល បានលាឈប់ពីអាជីពថតសម្តែងក្រោមកំដៅថ្ងៃ ហាលខ្យល់ ហាលភ្លៀងនោះ លោកក៏បានចាកចេញពីប្រទេសកម្ពុជា ដោយបានទៅរស់នៅសហរដ្ឋអាមេរិក ហើយលោកក៏បានសាងជីវិតគ្រួសារ និង រស់នៅទីនោះយ៉ាងមានសុភមង្គល ដោយកន្លងទៅនេះតាមរយៈគណនីហ្វេសប៊ុក គេតែងឃើញតារាប្រុសរូបនេះបង្ហោះរូបគ្រួសារ ពិសេសគឺថតរូបផុសជាមួយកូនស្រីជាទីស្រឡាញ់របស់ខ្លួនមិនដែលខានឡើយ។
យ៉ាងណាមិញ បើងាកមកមើលរូបសម្រស់ និង មុខមាត់របស់លោក នួន សុផល វិញ គឺនៅតែអ៊ែមខ្លាំង ពោលគឺលោកនៅតែមានសម្រស់ស្អាត និង សង្ហាមិនចេះចាស់សោះ ឯសាច់ដុំវិញនៅមាំដូចមុនដដែលគ្មានប្រែឡើយ បើធៀបនឹងពេលទើបចូលប្រឡូកសិល្បៈដំបូងៗនោះ៕
ប្រភព ៖ Movie star Research-សុិន ឧត្ដមផល្លា
