ទាក់ទងគ្នាបាន ត្រឹម ៩ ខែ ឥលូវ Kim Kardashian និង Pete Davidson ចែកផ្លូវគ្នាហើយ
បើតាមប្រភពជិតស្និទ្ធជាមួយតារាស្រី Kim Kardashian និង Pete Davidson ថ្លែងប្រាប់សារព័ត៌មាន E!News ថា គូស្នេហ៍តារាមួយគូនេះ បានចែកផ្លូវគ្នាហើយ ដោយសម្រេចប្ដូរទំនាក់ទំនងមកត្រឹមជាមិត្តនឹងគ្នាវិញ។
តាមប្រភពជិតស្និទ្ធនោះ បានឱ្យដឹងថា ខណៈគូស្នេហ៍តារាមួយគូនេះ មានការស្រឡាញ់ និង រាប់អានគ្នាខ្លាំង ប៉ុន្តែពួកគេចាប់ផ្ដើមយល់ឃើញថា ការនៅឆ្ងាយពីគ្នា និង តម្រូវការលើកាលវិភាគការងាររបស់ពួកគេ គឺបង្កជាការលំបាកក្នុងការរក្សាទំនាក់ទំនងស្នេហាមួយនេះ ទើបពួកគេសម្រេចបញ្ចប់ចំណងស្នេហ៍ ងាកមករាប់អានគ្នាជាមិត្តល្អវិញ។
គួររំឭកថា កាលពីខែវិច្ឆិកា ឆ្នាំ ២០២១ កន្លងទៅ មហាជនមានការភ្ញាក់ផ្អើល ក្រោយតារាស្រី Kim Kardashian និង តារាកំប្លែង Pete Davidson បានប្រកាសទាក់ទងគ្នាជាផ្លូវការ ដោយស្នេហារបស់តារាមួយគូនេះ គឺតែងបង្ហាញភាពស្អិតល្មួត ធ្វើឱ្យអ្នកគាំទ្រច្រណែនមិនតិចនោះឡើយ។ ទោះជាយ៉ាងណា អ្វីៗនៅពេលនេះ ត្រូវបានបញ្ចប់ ដោយប្ដូរទំនាក់ទំនងមកត្រឹមជាមិត្តល្អនឹងគ្នា៕