ចូលក្បាល ៤០ ឆ្នាំស្អែកខានស្អែកហើយ កែវ វាសនា ដូចទើបខ្ទង់សាមសិបស្ដើង

តារាចម្រៀងស្ថិតក្នុងដួងចិត្តយុវវ័យ កែវ វាសនា បានរៀបការមានប្រពន្ធរស់នៅយ៉ាងមានសុភមង្គលជាមួយកូនប្រុសម្នាក់ស្រីម្នាក់។

ជារឿយៗមហាជនអ្នកគាំទ្រតែងនាំគ្នាលើកសរសើរទៅលើតារាចម្រៀង កែវ វាសនា ថាលោកមិនត្រឹមតែមានភរិយាស្រស់ស្អាតមិនចាញ់អ្នកសិល្បៈទេ តែនាងថែមទាំងជានារីល្អ ពូកែមើលថែប្ដី និង កូនៗ ហើយក៏ជាអ្នករកស៊ីមានលុយកាន់ពេញៗដៃថែមទៀត។

ពេលវេលាបានរំលងផុតទៅជាច្រើនឆ្នាំ ម្ចាស់បទ «ចង់វិលរកសង្សារចាស់» រូបនេះ នៅតែទទួលបានប្រជាប្រិយភាពច្រើនក្រាស់ក្រែលពីទស្សនិកជន ជាពិសេសទោះបីជាពេលនេះ កែវ វាសនា បានក្លាយជាលោកប៉ារបស់កូនៗ ហើយក៏មានអាយុ ៣៩ ជិតចូល ៤០ ឆ្នាំហើយក្ដី ប៉ុន្ដែតារាចម្រៀងរូបនេះនៅតែស្រស់សង្ហា រក្សារូបរាងមិនខុសគ្នាប៉ុន្មានកាលពីលោកនៅកំលោះឡើយ។

ជាការពិត គ្រាន់តែ កែវ វាសនា បង្ហើបពីអាយុពិតរបស់លោកប្រាប់អ្នកគាំទ្រនៅលើបណ្ដាញសង្គមភ្លាម ក៏មានអ្នកលាន់មាត់ថា រូបរាង មុខមាត់ សម្បុរស្បែករបស់លោកប្រៀបដូចជាមនុស្សទើបតែមានវ័យសាមសិបឆ្នាំ ឬសាមសិបស្តើងប៉ុណ្ណោះ មើលយ៉ាងណាក៏មិនសមអាយុ ៣៩ ឆ្នាំដែរ៕