នឹកពេក! ពេលដល់ថៃភ្លាម Bie ដឹកដៃប្រពន្ធ និង កូនៗទៅធ្វើរឿងនេះភ្លែត
ជឿជាក់ថាប្រិយមិត្តដែលនិយមតាមដានរឿងភាគថៃភាគច្រើន មុខជាធ្លាប់បានស្គាល់រួចមកហើយ Bie Thassapak ឬ លោក Bie KPN តារាប្រុសរូបស្រស់វ័យ ៣០ ឆ្នាំ ដែលកំពុងសាងកេរ្តិ៍ឈ្មោះល្បីល្បាញ មិនត្រឹមតែនៅប្រទេសថៃប៉ុណ្ណោះទេ លោកថែមទាំងមានទីផ្សារនៅប្រទេសចិនថែមទៀត។
ក្រោយទៅធ្វើការក្រៅប្រទេសអស់ជិត ១ ឆ្នាំ ទីបំផុត Bie បានត្រឡប់វិលមកជួបជុំគ្រួសារវិញហើយ ដោយ Gubgib និង កូនៗបានឆ្លៀតទៅទទួលដល់ព្រលានយន្តហោះ ហើយបង្ហាញពីក្តីនឹករលឹកជាខ្លាំង។
យ៉ាងណាមិញ គ្រាន់តែមកដល់ថៃជួបជុំគ្រួសារភ្លែត គេសង្កេតឃើញថា Bie ដឹកដៃកូនៗ និង ភរិយាចេញដើរលេងកម្សាន្តនៅសួនកម្សាន្តភ្លាម ដើម្បីសាងអនុស្សាវរីយ៍គ្រួសារ ហើយក៏ដើម្បីបំបាត់ការនឹករឭកផងដែរ។
បន្ថែមពីនេះ Gubgib បានបង្ហោះសារថា ៖ «គ្រប់ក្រុមហើយ ៤ នាក់ពុកម៉ែកូន! ថ្ងៃនេះប៉ាៗនាំ Paopao និង Paopei ទៅកន្លែងដែលអូនប្រាថ្នា កូនៗចង់ឱ្យប៉ាៗមកលេងជាមួយគ្នា កូនៗរង់ចាំថ្ងៃនេះយូរមកហើយ»៕
