ស្រណោះណាស់! លោក សុះ ម៉ាច ពោលយ៉ាងក្ដុកក្ដួល ទោះវ័យជ្រេក៏ទៅមិនឆ្ងាយពីសិល្បៈ

ពីមួយថ្ងៃទៅមួយថ្ងៃ វិស័យសិល្បៈនៅកម្ពុជាក៏កាន់តែរីកចម្រើនឡើង ដោយគេឃើញមានវត្តមានសិល្បករ-ការិនីក្មេងៗស្រករក្រោយជាច្រើនបានរីកដុះដាលដូចផ្សិត មិនថាវិស័យចម្រៀង សម្ដែង ឬបង្ហាញម៉ូដនោះទេ។

យ៉ាងណាមិញ បើក្រឡេកទៅមើលសិល្បកររៀមច្បងវិញ មួយចំនួនបានឃ្លាតឆ្ងាយទៅរស់នៅបរទេស ចំណែកឯមួយចំនួនទៀតក៏នៅតែបន្តប្រឡូកក្នុងវិស័យសិល្បៈ ដើម្បីបង្ហើរសំនៀងយ៉ាងពីរោះក្រអួនក្រអៅបំពេអារម្មណ៍ទស្សនិកជនដដែល។

និយាយដល់សិល្បកររៀមច្បង ថ្មីៗនេះតារាចម្រៀងជើងចាស់ លោក សុះ ម៉ាច បានបង្ហោះសារមួយដែលមានអត្ថន័យចាក់ដោតខ្លាំងធ្វើឱ្យអ្នកគាំទ្រអានហើយក្ដុកក្ដួលមិនស្ទើរនោះទេ ខណៈលោក និង សិល្បករជើងចាស់ស្របាលៗគ្នាប៉ុន្មានរូបទៀត ដូចជា លោក ណូយ វ៉ាន់ណេត និង លោក ហួរ ឡាវី ជាដើម ត្រូវបានគេអញ្ជើញឱ្យទៅបកស្រាយចម្រៀងនៅភោជនីយដ្ឋានមួយកន្លែង។

ក្នុងនោះ លោក សុះ ម៉ាច បានរៀបរាប់ប្រាប់មហាជននៅលើបណ្ដាញសង្គមថា ៖ «ពួកខ្ញុំចាស់ៗមែន ប៉ុន្តែនៅតែទៅមិនឆ្ងាយពីសិល្បៈដរាបណាមហាជននៅតែគាំទ្រ ពួកខ្ញុំនឹងបន្តបំពេអារម្មណ៍ដដែល»៕