បេក្ខជនប្រឡងចម្រៀង ថុល សុភិទិ មានឥទ្ធិពលរហូតធ្វើឱ្យបវរកញ្ញា រឿន ណាត ដាច់ចិត្តធ្វើរឿងនេះលើកដំបូង
កម្មវិធីប្រឡងចម្រៀងលំដាប់ពិភពលោក Cambodian Idol រដូវកាលទី ៤ បានឈានដល់ Live Show ហើយ ដែលក្នុងនោះគេឃើញបេក្ខភាពទាំងអស់កំពុងខិតខំប្រឹងប្រែងបញ្ចេញសំឡេងឱ្យអស់ពីសមត្ថភាពដើម្បីយកឈ្នះចិត្តគណៈកម្មការ ក៏ដូចជាយកឈ្នះចិត្តអ្នកគាំទ្រដើម្បីឆ្ពោះទៅកាន់ការដណ្ដើមពានរង្វាន់លេខ ១។
ងាកមកបេក្ខជន ថុល សុភិទិ វិញ បានបង្ហាញខ្លួនយ៉ាងលេចធ្លោក្នុងវគ្គ Live Show សប្ដាហ៍ទី ១ ដោយរូបគេបានលើកយកបទ «មិនអាចឃាត់ទេ» មកប្រកួតប្រជែង។ តាមរយៈបទចម្រៀងមួយបទនេះ ភិទិ ធ្វើបានយ៉ាងល្អ បញ្ចេញសំឡេងយ៉ាងពីរោះក្រអួនក្រអៅធ្វើឱ្យគណៈកម្មការទាំង ៤ សរសើរមិនដាច់ពីមាត់ និង ធ្វើឱ្យទស្សនិកជនស្រែកហ៊ោកក្រើកឆាក។
ទឹកដមសំឡេងរបស់បេក្ខជនរូបសង្ហា សុភិទិ មិនត្រឹមតែអាចឆក់យកបេះដូងទស្សនិកជននៅក្នុងស្ទូឌីយោប៉ុណ្ណោះទេ សូម្បីតែបវរកញ្ញាចក្រវាល ២០១៨ កញ្ញា រឿន ណាត ក៏ទប់ចិត្តមិនជាប់ លាន់មាត់បង្ហើបពាក្យក្នុងចិត្តយ៉ាងរំភើបបង្ហោះលើបណ្ដាញសង្គម។
Miss Universe Cambodia 2018 កញ្ញា រឿន ណាត បានចែករំលែកវីដេអូប្រឡងចម្រៀងរបស់បេក្ខជន ថុល សុភិទិ ហើយសរសេររៀបរាប់ដោយមិនលាក់លៀមថា ៖ «ជាលើកទីមួយដែល Share គេប្រឡងចម្រៀង សំឡេងគាត់ឆក់យកបេះដូង»៕
