យក់ ថិតរដ្ឋា ឆ្លើយផូងទាំងអស់សំណើច ពេលគេសួរដល់រឿងយកកូនបន្ថែម

ចំណងអាពាហ៍ពិពាហ៍របស់កំពូលតារាចម្រៀងស្រីដ៏ល្បី អ្នកនាង យក់ ថិតរដ្ឋា និង លោក ឃុំ ប៉ុណ្ណាដែត ពេលនេះទទួលបានតំណក់ឈាមកូនប្រុសស្រី ៣ នាក់ហើយ ដែលកូនៗរបស់ពួកគេ ម្នាក់ៗមានមុខមាត់ស្រស់ស្អាត និង ស្រស់សង្ហាគួរឱ្យស្រឡាញ់ ជាពិសេសកូនប្រុសច្បងរបស់ពួកគេទាំងពីរដែលមានអាយុ ១៤ ឆ្នាំនោះ មានមុខមាត់ស្រស់សង្ហាដូចគ្នានឹងលោកប៉ាបេះបិទ។

ចាប់តាំងពី យក់ ថិតរដ្ឋា និង ឃុំ ប៉ុណ្ណាដែត កាន់ដៃគ្នាចូលរោងការ និង រួមរស់ជាប្ដីប្រពន្ធរយៈពេលច្រើនឆ្នាំមកនេះ ក៏មិនធ្លាប់លេចឮដំណឹងរកាំរកូសនឹងគ្នាដែរសម្រាប់គូស្វាមីភរិយាមួយគូនេះ ប៉ុន្ដែអ្វីដែលមហាជនអ្នកគាំទ្របានឃើញ គ្រួសាររបស់ពួកគេរស់នៅប្រកបដោយសុភមង្គលស្រឡាញ់ផ្អែមល្ហែមចំពោះគ្នារហូតបង្កើតបានកូនប្រុស ២ ស្រី ១ ដូចសព្វថ្ងៃ។

យ៉ាងណាមិញទន្ទឹមនឹងការទទួលបានទាយាទស្នងត្រកូលដល់ទៅ ៣ នាក់នេះ ថ្មីៗនេះ យក់ ថិតរដ្ឋា និង ស្វាមីក៏បាននិយាយក្នុងបទសម្ភាសជាមួយ សិល្បករកម្ពុជា ដោយក្នុងនោះមានការសួរនាំរឿងយកកូនបន្ថែមទៀត ស្រាប់តែភ្លាមនោះ កំពូលតារាស្រីរូបនេះ បានឆ្លើយតបទាំងអស់សំណើចថា នាងសុំមានកូនតែ ៣ នាក់នេះគ្រប់គ្រាន់ហើយ ដោយសារនាងមានការងារច្រើនត្រូវបំពេញ មិនសូវមានពេលវេលាគ្រប់គ្រាន់ក្នុងការមើលថែកូនៗឱ្យបានដិតដល់ ម្យ៉ាងនាងគិតថា កូន ៣ នាក់នេះសម្រាប់នាង និង គ្រួសារយល់ថាសមល្មមហើយ៕