បាត់មុខពីសិល្បៈ ម្ចាស់បទ «ក្រវ៉ាន់សៀមរាប» រស់នៅក្នុងជីវភាពយ៉ាងសាមញ្ញ
អតីតតារាចម្រៀងប្រចាំផលិតកម្ម រ៉ុក និង ជាម្ចាស់បទ «ក្រវ៉ាន់សៀមរាប» អ្នកនាង អ៊ុត ចរិយា បានឃ្លាតឆ្ងាយពីអាជីពសិល្បៈជាច្រើនឆ្នាំមកហើយ ដោយងាកទៅរស់នៅយ៉ាងមានសុភមង្គលជាមួយស្វាមី និង កូនៗជាទីស្រឡាញ់ តែយ៉ាងណាបើងាកទៅមើលសម្រស់តារាស្រីរូបនេះនាពេលបច្ចុប្បន្ន ហាក់មិនសូវប្រែប្រួលខុសពីមុនប៉ុន្មានឡើយ ស្ទើរមិនដឹងថានាងជាអ្នកម្តាយរបស់កូនៗដល់ទៅបីនាក់ផង។
គេចាំបានថា បន្ទាប់ពីពីផលិតកម្មរ៉ុកបានផ្អាក អ៊ុត ចរិយា មិនបានស្រវ៉ារកផលិតកម្មថ្មីដូចមិត្តភក្តិ ផន ស្រីខួច និង សួស វីសា នោះឡើយ ផ្ទុយទៅវិញនាងបានចាកចេញពីការងារនេះយ៉ាងស្ងៀមស្ងាត់ ហើយទៅសំងំរស់នៅបែបសាមញ្ញ តែក៏មើលទៅធូរធារគួរសម ជាមួយនឹងមុខរបរពេញនិយមនាពេលបច្ចុប្បន្នគឺលក់អនឡាញ។
បន្សាត់ខ្លួនពីអាជីពសិល្បៈចម្រៀងរាប់ឆ្នាំ មហាជនអ្នកគាំទ្រនៅតែចង់ឱ្យ អ៊ុត ចរិយា វិលមកកាន់ក្បាលមីក្រូវិញ ព្រោះពួកគេសែននឹកដល់ទឹកដមសំឡេងដ៏ពីរោះក្រអួនក្រអៅ ជាពិសេសជាមួយនឹងបទសម័យដើម តែយ៉ាងណាបច្ចុប្បន្ន អ៊ុត ចរិយា កំពុងសោយសុខនឹងជីវិតឯកជនដែលមានស្វាមីជាទីស្រឡាញ់នៅក្បែរ ព្រមទាំងមានកូនៗដល់ទៅបីនាក់ជាចំណងដៃ។
គួរបញ្ជាក់ថា អ៊ុត ចរិយា ចាប់ផ្តើមមានឈ្មោះបោះសំឡេងក្រោយនាងក្លាយជាតារាចម្រៀងនៅក្នុងផលិតកម្មរ៉ុក ជាពិសេសតាមរយៈបទ «ក្រវ៉ាន់សៀមរាប» ដែលបានដាក់បញ្ចូលនៅក្នុងរឿងភាគរបស់ទូរទស្សន៍ស៊ីធីអិននាពេលកន្លងមក ប៉ុន្តែគួរឱ្យស្តាយអតីតតារាចម្រៀងសំឡេងស្រទន់រូបនេះ បែរជាសម្រេចចិត្តចាកចេញពីអាជីពទៅវិញ៕