ពីបំណុលរុំខ្លួនរាប់ម៉ឺនដុល្លារ Chain ប្រឹងរកសងរហូតរួចអស់ ពេលនេះកំពុងរស់នៅក្នុងជីវិតហាយសូរដូចសេដ្ឋី
ជឿជាក់ថាមហាជនប្រាកដជានៅចងចាំនៅឡើយពីតារាប្រុសលោក Chain Tana ព្រោះតែការសម្តែង ក៏ដូចជាច្រៀងលើឆាកតន្រ្តីធំៗរបស់លោកជាច្រើននាពេលកន្លងមក ដែលបានធ្វើឱ្យមហាជនអ្នកគាំទ្រនៅតែចងចាំរូបលោកនៅក្នុងដួងចិត្តរហូតមក បើថ្វីដ្បិតពេលនេះលោកមិនសូវលេចមុខក្នុងការងារសិល្បៈក៏ដោយ។
បើគិតមកត្រឹមពេលនេះ ជាង ១១ ឆ្នាំទៅហើយ ដែល Chain បានបាត់ស្ងាត់សូន្យពីរង្វង់សិល្បៈ ក្រោយពេលលោកបានរៀបការជាមួយភរិយាក្រៅរង្វង់សិល្បៈម្នាក់មក រហូតមហាជនជាច្រើនសម្តែងក្តីនឹករឭក និង ចង់ដឹងពីសុខទុក្ខរបស់លោកជាខ្លាំងថា តើពេលនេះលោកកំពុងតែធ្វើអ្វី ហេតុអ្វីបាត់មុខពីសិល្បៈមិនឃើញត្រឡប់វិញ?
យ៉ាងណាមិញ ជុំវិញក្តីនឹករឭករបស់មហាជន បានធ្វើឱ្យតារាប្រុសរូបនេះលេចមុខឆ្លើយតបទៅកាន់អ្នកគាំទ្រជាទីស្រឡាញ់របស់លោក។ ក្នុងនោះលោកបានទម្លាយថា មូលហេតុដែលលោកមិនលេចមុខក្នុងសិល្បៈគឺដោយសារតែកាលពី ១១ ឆ្នាំមុន ពោលគឺពេលលោកអាយុ ២៣ ឆ្នាំ លោកឃ្លាតពីសិល្បៈដើម្បីងាកមកធ្វើជំនួញដំបូង តែវាបែរជាបរាជ័យ រហូតធ្វើឱ្យដួលរលំត្រូវជាប់បំណុលគេជាង ៣ លានបាត ដែលស្មើរនឹង ១០ ម៉ឺនដុល្លារ ជាហេតុធ្វើឱ្យលោក និង ភរិយាត្រូវសំងំមិនហ៊ានចេញមុខខំធ្វើការ និង រកវិធីដោះបំណុលអស់ជាច្រើនឆ្នាំទម្រាំរួចមកទល់ពេលនេះ។
លើសពីនេះទៅទៀត Chain ក៏បន្តថា បន្ទាប់ពីលោករួចបំណុលប្រៀបបានទេវតាប្រទានជីវិតឱ្យលោកសាជាថ្មីអ៊ីចឹង។ ចំណែករឿងការងារសិល្បៈលោកក៏មិនបានគិតថានឹងចូលវិញនោះដែរ ព្រោះដោយសារតែលោកមានជំនួញជាច្រើនដែលត្រូវគ្រប់គ្រងនាពេលនេះ។
គួរបញ្ជាក់ដែរថា បន្ទាប់ពីរួចបំណុល ជីវិតរបស់តារាប្រុសរូបនេះដូចជាមានពន្លឺណាស់ ពិសេសបើងាកទៅមើលពីជីវិត Chain និង ភរិយាពេលនេះវិញ គឺកំពុងរស់នៅមិនចាញ់សេដ្ឋីលំដាប់នោះទេ មានគ្រប់យ៉ាង ទាំងឡានល្អៗ និង ផ្ទះរស់នៅប្រៀបដូចវិមាន ដែលផ្ទះលោករស់នៅចំណាយអស់ ១៤៧ លានបាតឯណោះក្នុងការសាងសង់ឡើង៕