ស្រឡាញ់គ្នាយូរ ទើបតែពេលនេះ Esther ទម្លាយចរិតកែមិនបានមួយរបស់ Ken ដឹងហើយហួសចិត្ត
ជាង ៧ ឆ្នាំទៅហើយ ដែលគូស្នេហ៍របស់លោក Ken Phupoom និង តារាស្រីស្រស់ Esther Supreeleela បានសាងស្នេហ៍យ៉ាងបើកចំហនៅចំពោះមុខមហាជនអ្នកគាំទ្រនោះ។ ជាមួយនឹងទំនាក់ទំនងដ៏ស្អិតល្មួត និង ផ្អែមល្ហែមរបស់អ្នកទាំងពីរ បាន និង កំពុងតែធ្វើឱ្យអ្នកគាំទ្រជាច្រើនទទូចចង់ឃើញថ្ងៃពិសេសរបស់គូស្នេហ៍អ្នកទាំងពីរឆាប់ៗខាងមុខទៀតផង។
លើសពីនេះទៅទៀត គេសង្កេតឃើញថា ជារឿយៗគូស្នេហ៍មួយគូនេះហាក់លេចមុខជាញឹកញាប់នៅក្នុងសន្និសីទកាសែត ដោយទម្លាយពីទំនាក់ទំនង និង ស្នេហាដែលមានចំពោះគ្នាឱ្យមហាជនអ្នកគាំទ្របានដឹង និង បន្តគាំទ្រគូស្នេហារបស់អ្នកទាំងពីរជាបន្តបន្ទាប់ទៀតដែរ។
មួយវិញទៀត បន្ទាប់ពីបើកបង្ហាញពីភាពផ្អែមល្ហែម និង សកម្មភាពស្នេហ៍ទាំងប៉ុន្មានឱ្យមហាជនបានជ្រាបហើយនោះ ពេលនោះ តារាស្រី Esther ក៏បានទម្លាយពីចរិតពិតគូស្នេហ៍ដែលកែមិនបានមួយលើកប្រាប់ដល់មហាជនបានសើចលេងថា ៖ «មានរឿងមួយដែលអ្នកគាំទ្រមិនដឹង តាមពិតទៅឃើញ Ken មុខស្លូតអ៊ីចឹងទេ តែបើចរឹតពិតអាក្រក់បំផុតគឺ ពេលឃ្លានបាយម្តងៗចេញអារម្មណ៍ខឹងមួម៉ៅឆេវឆាវមកភ្លាម ដែលពេលខ្លះប៉ះពាល់ដល់អ្នកជុំវិញខ្លួនក៏មាន»៕
