ហ្វេនចាប់បានភ័ស្តុតាងច្បាស់ចែស ហេង វិសាល និង ស្រីនា ណាត់គ្នាស្ងាត់ៗតែ ២ នាក់

មិត្តៗយុវវ័យដែលស្រឡាញ់ចូលចិត្ត Youtuber ស្រុកខ្មែរប្រាកដជាស្គាល់ ហេង វិសាល និង ជា ស្រីនា ច្បាស់ដូចថ្ងៃ ព្រោះថាប៉ុន្មានឆ្នាំចុងក្រោយនេះ អ្នកទាំងពីរកាន់តែឡើងកូដខ្លាំង រហូតលេចមុខក្នុងស្បតពាណិជ្ជកម្មនានាមួយចំនួន ក៏ដូចជាចូលរួមក្នុងកម្មវិធីតូចធំរបស់អ្នកសិល្បៈ ហើយលើសពីនេះ កន្លងមកគេឃើញអ្នកទាំងពីរចេញវីដេអូរួមគ្នាច្រើនរាប់ភ្លេច ធ្វើឱ្យអ្នកគាំទ្រពេញចិត្តជាខ្លាំង។

ដោយសារតែកន្លងមក ទំនាក់ទំនងរវាង ហេង វិសាល និង ស្រីនា កាន់តែជិតដិតគ្នាខ្លាំងឡើងពីមួយថ្ងៃទៅមួយថ្ងៃ បូករួមទាំងសមត្ថភាព ចំណេះដឹង ឬរូបសម្បត្តិពួកគេទាំងពីរ សុទ្ធតែស័ក្ដិសមនឹងគ្នាផងនោះ ធ្វើឱ្យទស្សនិកជនដែលស្រឡាញ់គាំទ្រ Youtuber វ័យក្មេងមួយគូនេះ ចាប់ផ្ដើមជំរុញឱ្យពួកគេទាំងពីរទាក់ទងគ្នាជាគូសង្សារតែម្ដង។

យ៉ាងណាមិញមកដល់ពេលនេះ មិនថាភាគី ហេង វិសាល ឬ ស្រីនា ទេ អ្នកទាំងពីរមិនទាន់ប្រកាសថា មានទំនាក់ទំនងផ្នែកបេះដូងឱ្យស៊ីជម្រៅនឹងគ្នាឡើយ ក្រៅពីមិត្តរួមការងារ ឬបងប្អូនល្អ ប៉ុន្ដែកាលពីពេលថ្មីៗនេះកន្លងទៅ ហេង វិសាល ក៏ធ្លាប់និយាយក្នុងកម្មវិធីជជែកកម្សាន្ត «អ្នកជិតខាង» ថា ពេលនេះលោកកំពុងមើលចិត្តថ្លើមជាមួយនារីម្នាក់ តែមិនបានបញ្ជាក់ពីអត្តសញ្ញាណនារីរូបនោះឡើយ។

ស្រាប់តែថ្មីៗនេះ ហេង វិសាល បានបង្ហោះរូបថត ១ សន្លឹក ព្រមជាមួយ Caption យ៉ាងទាក់ទាញថា ៖ «ពេលនៅជាមួយអ្នក ទោះជាកំពុងពិបាកចិត្តប៉ុនណាក៏ញញឹមចេញដែរ»។ គ្រាន់តែ ហេង វិសាល ផុសរូបនេះមិនបានប៉ុន្មាននាទីផង ស្រីនា បានស៊ែរការផុសនេះ ហើយរៀបរាប់ថា ៖ «Caption បោកគេបានមួយប្រទេស»។ រឿងដែលភ្ញាក់ផ្អើលបំផុត ទីកន្លែងដែល ហេង វិសាល ទៅនោះ គឺជាកន្លែងតែមួយនឹង ស្រីនា បានទៅ ហើយថែមទាំងថតរូបបង្ហោះនៅលើបណ្ដាញសង្គមតាំងពីកំឡុង ខែធ្នូ ឆ្នាំ ២០២១ មកម្ល៉េះ។

អ្នកលេងបណ្ដាញសង្គមជាច្រើនបាននាំគ្នាយករូបថត ស្រីនា និង ហេង វិសាល មកផ្ទឹមគ្នា ព្រោះពួកគេសង្ស័យថាអ្នកទាំងពីរបានណាត់គ្នាមិនមែនចៃដន្យនោះទេ ហើយម្យ៉ាងពួកគេសុទ្ធតែពាក់អាវខ្មៅដូចគ្នា ថែមទាំងទៅកន្លែងតែមួយទៀត៕