ពោះខ្ទាតប៉ុនណាណី បេនី យ៉ាំង ស្លៀកពាក់ឡើង High ដើរលេងសួនសត្វធ្វើមិនដឹង

ទើបតែប្រកាសដំណឹងល្អថ្ងៃមុនសោះ គិតមកដល់ពេលនេះតារាសម្ដែង បេនី យ៉ាំង ជិតបានឃើញមុខតំណក់ឈាមដំបូងរវាងនាង និង គូស្នេហ៍ហើយ ដោយបច្ចុប្បន្នតារាស្រីរូបនេះបានពពោះកូនក្នុងផ្ទៃបានប្រមាណជាង ៦ ខែហើយ ចំណែកឯទំហំពោះក៏កាន់តែខ្ទាតធំឡើងឃើញទម្រង់ច្បាស់ៗតែម្ដង។

ទោះបីជាកូនក្នុងផ្ទៃកាន់តែធំលូតលាស់ឡើងពីមួយថ្ងៃទៅមួយថ្ងៃ ប៉ុន្ដែនោះមិនមែនជាឧបសគ្គសម្រាប់អ្នកម៉ាក់សម័យ បេនី យ៉ាំង ក្នុងការតុបតែងខ្លួនបែបនារីហាយសូរ ធ្វើជាអ្នកម៉ាក់កាលីបស៊ីវិស័យលេងម៉ូដសម្លៀកបំពាក់ Fashion នោះទេ។ ស្របពេលទំហំពោះកាន់តែខ្ទាតធំ ងាកទៅអ្នកម៉ាក់វ័យក្មេង បេនី យ៉ាំង នៅតែរំលេចខ្លួនជាមួយការស្លៀកពាក់បែបស្ទាវៗដដែល។

តួយ៉ាងថ្មីៗនេះ បេនី យ៉ាំង បានបង្ហោះរូបថតជាច្រើនសន្លឹកនៅលើបណ្ដាញសង្គម បង្ហាញពីដំណើរកម្សាន្តនៅសួនសត្វមួយកន្លែង ដែលក្នុងនោះមហាជនឃើញអ្នកម៉ាក់ហាយសូររូបនេះនៅតែស្លៀកខោខូវប៊យ អាវរឹបរាង រំលេចភាពសិចស៊ីបែបទាន់សម័យ បង្ហាញទំហំក្បាលពោះដែលកាន់តែខ្ទាតធំឡើងៗនោះ ដើរលេងចាយសម្រស់ធ្វើព្រងើយយ៉ាងមានក្ដីសុខ៕