ចៀវៃ ទម្លាយក្តីបារម្ភចូលកាន់តំណែងថ្មី ខណៈមានលុយរាប់លានដុល្លារក្នុងដៃ
កាលពីពេលថ្មីៗនេះ តារាសម្ដែងស្រីចិនតៃវ៉ាន់ Ruby Lin ដែលអ្នកទស្សនិកជនភាគច្រើនបានស្គាល់ថា ចៀវៃ បានចេញមុខចែករំលែករឿងរ៉ាវដែលនាងធ្លាប់ឆ្លងកាត់នឹងប្រឈមមុខការរើសអើងជាច្រើន នៅខាងក្រោយកាមេរ៉ា។
យ៉ាងណាមិញ បើតាមប្រភពចេញពី Sina បានចុះផ្សាយទាក់ទងនឹងបទសម្ភាសរបស់នាង ជាមួយនឹងអ្នកសារព័ត៌មាន ដោយតារាស្រីរូបនេះបានទម្លាយអំពីសម្ពាធក្នុងតួនាទីរបស់ខ្លួនបន្ទាប់ពីក្លាយជាអ្នកដឹកនាំ និង ផលិតករ។ ពេលនោះ ចៀវៃ បានប្រឈមមុខនឹងការរើសអើង ព្រមជាមួយនឹងមតិចម្រុះពីទស្សនិកជន។
ទាក់ទងនឹងគម្រោងភាពយន្តរបស់ Ruby Lin ដោយតារាស្រីរូបនេះ បាននិយាយថា នាងទទួលស្គាល់ថាខ្លួនឯងមានចំណុចខ្វះខាតច្រើន ភាពចាស់ទុំក្នុងតួនាទីជាអ្នកដឹកនាំរឿង និង ផលិតករ នៅមានកម្រិត ព្រោះនេះជាការចាប់ផ្តើម។
មិនត្រឹមតែប៉ុណ្ណោះ តារាស្រីរូបនេះ បានបន្តថា នាងបានជួបប្រទះការលំបាកជាច្រើនក្នុងដំណើរការអនុវត្ត។ នាងនៅតែមានការព្រួយបារម្ភ បើទោះជាមានលុយ ១០លានដុល្លារដើម្បីថតរឿងក៏ដោយ ក៏ព្រោះតែនាងចង់ផលិតភាពយន្តឱ្យហ្មត់ចត់បំផុតតាមដែលអាចធ្វើទៅបាន។
គួររំឭកផងដែរថា កាលពីឆ្នាំ ២០២១ Ruby Lin បានសម្រេចដកខ្លួនចេញពីវិស័យភាពយន្តនៅចិនដីគោក មូលហេតុនាងត្រូវផ្លាស់មករស់នៅតៃវ៉ាន់ ហើយការងារនៅទីនោះក៏មិនសូវជាអំណោយផល មួយវិញទៀត នាងក៏ចង់មានពេលវេលាសម្រាប់គ្រួសារផងដែរ៕