ជារឿងដែលគួរឱ្យរំភើបចំពោះកីឡាការិនី ស៊ន សៀវម៉ី និង ស្វាមី ដោយនៅថ្ងៃទី ១៣ ខែមករា ឆ្នាំ ២០២២ នេះ បានរៀបចំពិធីឡើងគេហដ្ឋានថ្មីយ៉ាងអធឹកអធមគួរឱ្យកត់សម្គាល់ ហើយរឿងដែលមហាជនកាន់តែចាប់អារម្មណ៍ថែមទៀត ក្នុងពិធីឡើងវីឡារាប់ម៉ឺនដុល្លារនេះ ពួកគេក៏បានឆក់ឱកាសពិសេសនេះ ស្លៀកឈុតកូនកំលោះកូនក្រមុំក្រាបផ្ទឹមម្ដងទៀត។
ជឿជាក់ថាប្រិយមិត្តដែលនិយមតាមដានជីវិតឯកជនរបស់លោកជំទាវ ស៊ន សៀវម៉ី ប្រាកដជាបានជ្រាបហើយថា លោកជំទាវ និង ស្វាមី បានរៀបចំពិធីសែនព្រេនសាមញ្ញៗកាន់ដៃគ្នាជាប្ដីប្រពន្ធ ដោយមានតែចាស់ទុំ និង ក្រុមគ្រួសារទាំងសងខាងដឹងឮប៉ុណ្ណោះ រហូតមកដល់ពេលនេះ ប្ដីប្រពន្ធអ្នកទាំងពីរទទួលបានតំណក់ឈាមកូនប្រុសដំបូង ពួកគេក៏ឆ្លៀតឱកាសល្អយកកម្មវិធីឡើងផ្ទះថ្មីនេះ ស្លៀកឈុតព្រះថោងនាងនាគតោងស្បៃគ្នាបំពេញក្ដីស្រមៃក្លាយជាគ្រួសារពេញលេញ។
ដ្បិតថាជំទាវ ស៊ន សៀវម៉ី និង ស្វាមី ទទួលបានតំណក់ឈាមដែលជាកូនប្រុសម្នាក់រួមគ្នារួចទៅហើយទើបមានឱកាសស្លៀកឈុតប្រពៃណីបុរាណក្រាបផ្ទឹមមុខចាស់ទុំក៏ពិតមែន តែមើលទៅពួកគេពិតជាមានក្ដីសុខ ស្រឡាញ់ល្អូកល្អិនចំពោះគ្នាទៅវិញទៅមកខ្លាំងណាស់៕
