ទាក់ទងគ្នាជាង ២០ ឆ្នាំនេះជាលើកទី ១ ហើយដែល Anne ទម្លាយចរិតពិតគូស្នេហ៍ប្រាប់អ្នកគាំទ្រ
បើនិយាយពីគូស្នេហ៍កំពូលតារាស្រី Anne Thongprasom និង គូស្នេហ៍របស់នាង លោក A Tinnabhan វិញ បើគិតមកទល់ពេលនេះជាង ២០ ឆ្នាំទៅហើយ ដែលអ្នកទាំងពីរបានចាប់ផ្តើមសាងចំណងស្នេហ៍ដ៏រឹងមាំជាមួយគ្នា ដោយមិនមានការលាក់បាំងចំពោះមុខមហាជន ក៏ដូចជាគ្រួសារទាំងសងខាងនោះ។
បន្ទាប់ពីចាប់ដៃគ្នាសាងស្នេហ៍អស់ពេលជាច្រើនឆ្នាំរួចមក ក៏មានមហាជនមិនតិចនោះដែរ ដែលទទូចចង់ឃើញអ្នកទាំងពីរកាន់ដៃគ្នាចូលរោងការឆាប់ៗ។ ជុំវិញរឿងរៀបការនេះដែរ តារាស្រី Anne Thongprasom ក៏ធ្លាប់បានទម្លាយរួចមកហើយថា នាងនៅពុំទាន់គិតរឿងរៀបការនៅឡើយទេ ពេលនេះនាង និង គូស្នេហ៍ចង់ផ្តោតសំខាន់លើការងាររៀងខ្លួនសិន។
អ្វីដែលមហាជនចាប់អារម្មណ៍ នៅថ្ងៃទី ៤ ខែមករា ឆ្នាំ ២០២២ កន្លងទៅនេះ ឆ្លងឆ្នាំថ្មីមិនទាន់បានប៉ុន្មានថ្ងៃផង ស្រាប់តែតារាស្រី Anne Thongprasom ទម្លាយខ្ទេចគ្មានសល់ពីអត្តចរិតគូស្នេហ៍ដោយគ្មានលាក់បាំងថា ៖ «តាមពិត លោក A Tinnabhan ជាមនុស្សនិយាយច្រើនណាស់ និយាយមិនឈប់នោះទេរាល់ថ្ងៃ កើតមកមួយជាតិនេះមិនធ្លាប់ជួបអ្នកណានិយាយច្រើនបែបនេះទេ អ្នកគ្រប់គ្នាគិតថាគាត់ជាមនុស្សមិនសូវចេះនិយាយស្តី តាមពិតទៅគិតខុសហើយ និយាយច្រើនណាស់»។ ក្នុងនោះដែរនាងក៏បានបន្តទៀតថា បើនិយាយពីរឿងប្រឡូសប្រឡាក់ធ្វើឱ្យរបស់របេររប៉ាត់រប៉ាយទុកចិត្តលើលោក A Tinnabhan ចុះគឺគ្មានគូប្រៀបឡើយ។
យ៉ាងណាមិញ ខណៈឃើញវីដេអូរបស់ Anne Thongprasom ចំអន់គូស្នេហ៍ភ្លាម ធ្វើឱ្យមហាជនជាច្រើនបានចូលទៅខមមិនចំអន់នាងលេងយ៉ាងដូច្នេះថា ៖ «ពិតជាអាណិត Anne ណាស់, គួឱ្យស្រឡាញ់ណាស់គូស្នេហ៍មួយគូនេះ, ទោះរអ៊ូយ៉ាងណាក៏មើលទៅនៅតែគូឱ្យស្រឡាញ់ដដែល ទាំងខាងប្រុស និង ខាងស្រី»៕