វ៉ាន់ វល័ក្ខ តារាស្រីមានជីវិតតស៊ូ ពីក្មេងកំព្រាប្រឹងរហូតមានលុយ ឡាន ផ្ទះវីឡាធំស្កឹមស្កៃផ្ទាល់ខ្លួន
វ៉ាន់ វល័ក្ខ ត្រូវបានមហាជនចាត់ទុកជាតារាសម្ដែងស្រីចូលចិត្តតុបតែងខ្លួនបែបសិចស៊ីតាមបែបនារីសម័យថ្មីមួយរូប ដោយសារស្រីស្អាតរូបនេះ មានដងខ្លួនតូចស្រឡូន សាច់សខ្ចី មុខមាត់ទាក់ទាញមានមន្តស្នេហ៍មិនខ្លាចនឹងបង្ហាញទៅដល់មហាជនឡើយ។
យ៉ាងប៉ុន្មានឆ្នាំចុងក្រោយនេះ គេឃើញតារាសម្ដែងស្រីសិចស៊ី វ៉ាន់ វល័ក្ខ កាន់តែប្រើប្រាស់ជីវិតហាយសូរ រស់នៅបែបនារីអភិជនគួរឱ្យកត់សម្គាល់ជាមួយនឹងការប្រើប្រាស់របស់របរម៉ាកល្បីៗ ជិះសុទ្ធតែរថយន្តទំនើបតម្លៃរាប់ម៉ឺនដុល្លារ ជាពិសេសថ្មីៗនេះ ស្រីស្អាតខាងលើស្រាប់តែបង្អួតផ្ទះវីឡាដ៏ធំស្កឹមស្កៃតម្លៃរាប់ម៉ឺនដុល្លារទៀត បង្ហោះនៅលើបណ្ដាញសង្គមហ្វេសប៊ុក។
ខណៈពេលនេះជីវិត វ៉ាន់ វល័ក្ខ ហាក់មានអ្វីៗគ្រប់យ៉ាងហើយ តែនៅពីក្រោយភាពជោគជ័យនេះ តារាសម្ដែងស្រីសិចស៊ីរូបនេះស្រាប់តែរំឭកថា នាងធ្លាប់ជាក្មេងកំព្រាត្រូវគេមើលងាយម្នាក់ តែព្យាយាមតស៊ូប្រឹងប្រែងរហូតមានទ្រនំច្បាស់លាស់ដូចពេលនេះ។
ស្រីស្អាត វ៉ាន់ វល័ក្ខ ទម្លាយថា ៖ «កំណត់គោលដៅឱ្យច្បាស់លាស់ហើយសម្រេចធ្វើឱ្យពិតប្រាកដ នោះគ្មានអ្វីដែលយើងស៊ូហើយយកមិនបាននោះទេ #ក្មេងកំព្រាម្នាក់នេះមានលំនៅឋានពិតប្រាកដច្បាស់លាស់ហើយ អរគុណពាក្យធ្លាប់មើលងាយកន្លងធ្វើឱ្យខ្ញុំតស៊ូខំប្រឹង ហេងៗការចូលមករស់នៅកន្លែងថ្មី»៕