IU ធ្លាប់ឱ្យកាដូអរគុណមិននឹកស្មានមួយទៅ G-Dragon ក្រោយពួកគេបានធ្វើរឿងនេះជាមួយគ្នា
ប្រិយមិត្តអ្នកគាំទ្រវិស័យសិល្បៈកូរ៉េ ប្រាកដជាចូលចិត្តឃើញទំនាក់ទំនងរាប់អានរវាងតារាប្រុសស្រីជាក់ជាមិនខាន ព្រោះមើលទៅគួរឱ្យកក់ក្តៅ និង ជាការបញ្ជាក់ថាពួកគេពិតជាពេញចិត្តក្នុងការជាអ្នករួមអាជីពជាមួយគ្នាផងដែរ។
ដោយឡែក បើក្រឡេកមកមើលទំនាក់ទំនងរវាង កំពូលតារាប្រុស G-dragon និង តារាស្រី IU ក៏បានធ្វើឱ្យអ្នកគាំទ្រអត់សរសើរមិនបានដែរ ព្រោះបើទោះជាមិននៅផលិតជាមួយគ្នាក៏ដោយ ក៏អ្នកទាំងពីរនៅតែអាចមានភាពជិតស្និទ្ធរាប់អាននឹងគ្នាបានដែរ។
យ៉ាងណាមិញ លើសពីនេះទៅទៀត កាលពីឆ្នាំ ២០១៧ កន្លងទៅ កំលោះថែមទាំងបានលេខមុខបញ្ចេញសំឡេងនៅក្នុងបទចម្រៀង «Palette» របស់ស្រីស្រស់ IU ថែមទៀតផង ដែលធ្វើឱ្យអ្នកគាំទ្រសប្បាយអរភ្ញាក់ផ្អើលមិនស្ទើរនោះទេ។
ជាងនេះទៅទៀត ដើម្បីជាការអរគុណដល់ប្រុសស្អាត សម្រាប់ការផ្តល់យោបល់ល្អ ការលើកទឹកចិត្ត ក៏ដូចជាការចូលរួមសហការចម្រៀងនេះ IU ក៏បានលេចមុខនៅក្នុងខនសឺតរបស់ G-Dragon វិញ ហើយថែមទាំងជូនកាដូជាទូទឹកកកមួយដែលពេញទៅដោយស្រាសកូរ៉េ Soju ព្រមជាមួយអក្សរសរសេរដៃនៅលើនោះដបទាំងនោះថា «Pretty 30 Years old» ថែមទៀតផង។
យ៉ាងណាមិញ ចំណែក G-dragon បានទម្លាយយ៉ាងរីករាយដូចនេះវិញដែរថា ប្រហែលជា IU ចង់លើកទឹកចិត្តសរសើរលោកថា ទោះជាលោកអាយុ ៣០ ទៅហើយក្តី តែក៏នៅតែក្មេងហើយស្អាតដដែលហើយមើលទៅ។
ចំណែកអ្នកគាំទ្រកាលបើឃើញតារាប្រុសស្រីទាំងពីរមានទំនាក់ទំនងល្អជាមួយគ្នាបែបនេះ គេក៏រឹតតែសប្បាយចិត្តលើសដើម ហើយគេក៏សង្ឃឹមថា IU និង G-Dragon អាចសហការគ្នាចេញបទចម្រៀងនៅថ្ងៃមុខទៀតផងដែរ៕
