បើកបង្ហាញលុយ ដែលតួព្រះនាងរៀបអភិសេក រកបាន រាប់យូរអាចគាំងម៉ាស៊ីន ព្រោះច្រើនខ្លាំង
នាង Charmaine Sheh ជាកំពូលតារាស្រីហុងកុង ប្រចាំប៉ុស្តិ៍ TVB មួយរូបដែលមានភាពល្បីល្បាញខ្លាំង និង មហាជនខ្មែរបានស្គាល់នាងច្បាស់តាមរយៈការសម្តែងដ៏ប៉ិនប្រសប់ក្នុងរឿងភាគជាច្រើន ទាំងសម័យ និង បុរាណ ។
មកដល់ឆ្នាំ ២០២១ នេះ តារាស្រី Charmaine Sheh មានវ័យ ៤៦ ឆ្នាំហើយ ប៉ុន្តែបើនិយាយពីរូបសម្រស់វិញ ស្ទើរតែវ៉ាដាច់សិល្បការិនីក្មេងៗមួយចំនួន ព្រោះទៅនាងនៅតែស្រស់ស្អាត និង មានសាច់ចាំនៅឡើយ ។ ស្របគ្នានឹងសម្រស់នៅតែចាំស្អាតនេះ តារាស្រី Charmaine Sheh នៅតែឆក់បានទីផ្សារសិល្បៈខ្ពស់ ដោយនាងតែងតែក្តោបបានការងារជាច្រើន ទាំងថតផ្សាយពាណិជ្ជកម្ម និង សម្តែងរឿង ហើយតារាស្រីរូបនេះ ក៏ស្ទើរតែមិនរបូតសោះឡើយនូវតួអង្គឯក ឬ សំខាន់ តាំងពីប្រឡូកក្នុងការសម្តែងអស់ប្រមាណ ២៤ ឆ្នាំកន្លងមកនេះ ។
បើនិយាយពីប្រាក់ចំណូលរបស់កំពូលតារាស្រីហុងកុង វ័យ ៤៦ ឆ្នាំ ដែលទទួលបានពីអាជីពសិល្បៈនេះវិញ ក៏កាន់តែញាក់សាច់ទៀតហើយ គិតមកទល់ឆ្នាំ ២០២១ នេះ ។ បើយោងតាមវេបសាយវិគីភីឌាបានបង្ហាញថា ទ្រព្យសម្បត្តិសរុបរបស់តារាស្រី Charmaine Sheh នៅក្នុងឆ្នាំ ២០២១ នេះ គឺមានប្រហែល ១៣០,៦ លានដុល្លារ ។
គួរឱ្យដឹងផងដែរថា នាង Charmaine Sheh បានឈានជើងចូលសិល្បៈតាមរយៈកម្មវិធីប្រកួតបវរកញ្ញាហុងកុង ឆ្នាំ ១៩៩៧ ដោយកាលណោះនាងទទួលបានជ័យលាភីលេខ ២ ។ បន្ទាប់ពីទទួលបានលេខ ២ ក្នុងកម្មវិធីប្រកួតបវរកញ្ញាហុងកុង នៅ ១ ឆ្នាំបន្ទាប់ ពោលគឺនៅឆ្នាំ ១៩៩៨ តារាស្រី Charmaine Sheh បានចុះកុងត្រានៅប៉ុស្តិ៍ទូរទស្សន៍ TVB តាំងពីពេលនោះមក នាងក៏បានសាងប្រជាប្រិយភាពល្បីសុសសាយ និង រកបានប្រាក់ចំណូលច្រើនមហាសាលដល់បច្ចុប្បន្ន ៕
