ចាប់ពីចូលសិល្បៈ Park Seo Joon ធ្លាប់ផ្ទុះរឿងអាស្រូវស្នេហា នឹងតារាស្រីល្បីៗ ៣ រូប
បុរសសង្ហា Park Seo Joon ជាតារាសម្តែងកូរ៉េដ៏មានប្រជាប្រិយភាព និង ទទួលបានកាគាំទ្រខ្លាំង ជាពិសេសគឺតាមរយៈរឿង «Itaewon Class» ដែលជោគជ័យខ្លាំងក្នុងឆ្នាំ ២០២០ ។ ថ្មីៗនេះ លេចឮដំណឹងថា Park Seo Joon បានបោះជំហានដើរចូល Marvel ជាផលិតកម្មផលិតខ្សែភាពយន្តបែប Hero ដ៏ល្បីរបស់ក្រុមហ៊ុន Disney ដោយត្រៀមនឹងចូលរួមសម្តែងក្នុងរឿង «Captain Marvel 2» ។
គិតមកទល់ពេលនេះ គឺរយៈពេលជាង ១០ ឆ្នាំមកហើយ ដែលតារាប្រុសជួរមុខរបស់កូរ៉េខាងត្បូងវ័យ ៣២ ឆ្នាំ រូបនេះ បានចូលសម្តែងថតខ្សែភាពយន្តខ្នាតធំ និង រឿងភាគទូរទស្សន៍ជាច្រើនរឿង ជាមួយនឹងការធ្លាប់ជួបដៃគូសម្តែងស្រីជាច្រើននាក់ ។
Park Seo Joon ក៏ធ្លាប់មានពាក្យខ្សឹបខ្សៀវចចាមអារ៉ាមពីរឿងរ៉ាវស្នេហាជាច្រើនដងមកដែរ ដោយក្នុងនោះតារាសម្តែងស្រី ៣ ដួងធ្លាប់លេចឮដំណឹងទាក់ទងស្នេហាជាមួយរូបលោក មានដូចជា ៖
១. Park Seo Joon និង តារាសម្តែងស្រី Baek Jin Hee
នៅក្នុងឆ្នាំ ២០១៥ Park Seo Joon និង តារាសម្តែងស្រី Baek Jin Hee ត្រូវបានទស្សនាវដ្តីមួយរបស់កូរ៉េ ទម្លាយថាអ្នកទាំង ២ បានមានទំនាក់ទំនងស្នេហានឹងគ្នា ក្រោយអ្នកទាំងពីរបានចូលរួមសម្តែងក្នុងកម្មវិធីទូរទស្សន៍ល្បីមួយរបស់កូរ៉េ «Pots of Gold» ដោយដើរតួជាគូស្នេហ៍វ័យក្មេង ។
តាមពិតទៅ រឿងរ៉ាវខ្សឹបខ្សៀវរបស់តារាសម្តែងប្រុសស្រីមួយគូនេះ បានរសើបឡើងតាំងពីឆ្នាំ ២០១៣ មកម្ល៉េះ គឺតាំងពីពេលកម្មវិធីទូរទស្សន៍មួយនេះបង្កើត និង ចាក់ផ្សាយដំបូង ដោយមហាជនបានមើលឃើញពួកគេស័ក្តិសមគ្នា ជាពិសេសគឺល្អូកល្អិនដូចគូស្នេហ៍ពិតៗ ។ យ៉ាងណា រឿងរ៉ាវរសើបមួយនេះត្រូវបានបញ្ចប់ ក្រោយក្រុមហ៊ុនដែលគ្រប់គ្រងអ្នកទាំងពីរបានចេញមុខបដិសេធ ។
២. Park Seo Joon និង តារាសម្តែងស្រី Kim Ji Won
ក្រោយពេលដែលបញ្ចប់សាច់រឿង «Fight My Way» ដែលចេញផ្សាយក្នុងឆ្នាំ ២០១៧ រួចមក Park Seo និង តារាស្រី Kim Ji Won ត្រូវបានលេចពាក្យចចាមអារ៉ាមថា អ្នកទាំងពីរមានទំនាក់ទំនងស្នេហានឹងគ្នា រហូតមានការភ្ជាប់ពាក្យ ។ ពាក្យខ្សឹបខ្សៀបនេះបានកើតឡើងក្រោយពេល Park Seo Joon បានផ្តល់បទសម្ភាសថា អំឡុងពេលសម្តែងរឿងនេះ អ្នកទាំងពីរបានជួបគ្នាជាញឹកញាប់នៅក្នុងបន្ទប់ហាត់សម ហើយមានពេលខ្លះសរសេរពាក្យ «ខ្ញុំស្រឡាញ់អ្នក» ឱ្យគ្នាទៅវិញទៅមក ។
យ៉ាងណាមិញ អ្នកទាំងពីរបានបដិសេធថាវាមិនពិតនោះឡើយ ដោយតារាសម្តែងស្រី Kim Ji Won បានអស់សំណើច ព្រោះមិននឹកស្មានថាមានពាក្យចចាមអារ៉ាមបានកើតឡើង រហូតដល់មានអ្នកថារូបនាង និង Park Seo Joon ភ្ជាប់ពាក្យ ។
៣. Park Seo Joon និង តារាសម្តែងស្រី Park Min Young
នៅក្នុងឆ្នាំ ២០១៩ លោក Park Seo Joon ត្រូវបានមហាជនចាប់គូឱ្យជាថ្មីជាមួយតារាសម្តែងស្រី Park Min Young ដែលអ្នកទាំងពីរ បានជួបគ្នាក្នុងពេលសម្តែងរឿង «What’s Wrong with Secretary Kim» ។ ក្រោយមក សាមីខ្លួនទាំងសងខាងបានធ្វើការបដិសេធ ដោយនិយាយពួកគេរាប់អានគ្នាក្នុងនាមជាមិត្តភក្តិរួមអាជីពតែប៉ុណ្ណោះ ៕
