អ្នកគាំទ្រស្រឡាំងកាំង ឃើញ សុភ័ក្ត្រ កុសុម៉ា និងតារាប្រុសស្រី ៣ រូបទៀត ក្នុងវីដេអូចម្រៀង ១៦ ឆ្នាំមុន

កន្លងមហាជនអ្នកគាំទ្រតារាស្រី សុភ័ក្ត្រ កុសុម៉ា ប្រាកដជាធ្លាប់បានដឹងមកហើយ ពីទំនាក់ទំនងរវាងនាង និង នាយព្រែក ដែលជាកូនប្រុសរបស់តារាកំប្លែងជើងចាស់ យាយយ៉យ គឺជាមិត្តភក្តិរាប់អានគ្នាជាច្រើនឆ្នាំតាំងពីនៅកុមារភាព ។ បើក្រឡេកទៅមើលការងារវិញក៏ដូចគ្នា សុភ័ក្ត្រ កុសុម៉ា និង នាយព្រែក ក៏ធ្លាប់បានធ្វើការរួមគ្នាក្នុងវិថីសិល្បៈតាំងពីក្មេង រហូតដល់ក្រមុំ កំលោះរៀងៗខ្លួនដែរ ។

ថ្មីៗនេះ មហាជនអ្នកលេងបណ្តាញសង្គមហ្វេសប៊ុកក៏កំពុងតែចាប់ភ្លឹកនៅបទចម្រៀងខារ៉ាអូខេមួយរបស់ផលិតកម្មនាគមាស ដែលគេបានដឹងថាជាទ្រនំដំបូងនៃការបោះជំហានក្លាយជាតារាចម្រៀងរបស់កញ្ញា សុភ័ក្ត្រ កុសុម៉ា កាលពីក្មេង ។

វីដេអូខារ៉ាអូខេចំណងជើងថា «សុំលេងផង» នេះមានការសម្តែងរួមគ្នាដោយ កញ្ញា សុភ័ក្ត្រ កុសុម៉ា និង នាយព្រែក កាលពីក្មេងៗតាំងពីឆ្នាំ ២០០៥ ។ លើសពីនោះ អ្វីដែលកាន់តែធ្វើឱ្យអ្នកទស្សនាចាប់អារម្មណ៍បន្ថែមទៀតនោះ វីដេអូខារ៉ាអូខេខាងលើមិនត្រឹមតែមានការសម្តែងដោយកញ្ញា សុភ័ក្ត្រ កុសុម៉ា និង នាយព្រែក តែ ២ នាក់ ​ទេ តាមពិតក៏មានវត្តមានតារាសម្តែងប្រុសស្រីជាច្រើនរូបទៀត ដូចជាអ្នកនាង លី ចាន់សីហា និង អ្នកនាង ឡោម លក្ខិណា ជាដើម ។

ក្រោយពីបានទស្សនាវីដេអូខារ៉ាអូខេសម្តែងរួមគ្នារបស់តារាប្រុសស្រីមានប្រជាប្រិយភាព ទាំង ៤ នាក់ ខាងលើនេះហើយ បានធ្វើឱ្យអ្នកលេងបណ្តាញសង្គមហ្វេសប៊ុកលាន់មាត់ថា កញ្ញា សុភ័ក្ត្រ កុសុម៉ា នាយ ព្រែក អ្នកនាង លី ចាន់សីហា និង អ្នកនាង ឡោម លក្ខិណា ពិតជាមានទេពកោសល្យសិល្បៈតាំងពីក្មេងៗ ។ លើសពីនោះ បើក្រឡេកទៅមើលមុខមាត់វិញគឺឃ្យូដៗគួរឱ្យស្រឡាញ់ដូចៗគ្នា ៕