អីយ៉ា! ស្ងាត់ៗ លីកា អតីតសមាជិកក្រុម OMG ត្រូវបានគូស្នេហ៍ឱ្យចាស់ទុំចូលចែចូវហើយ
ប្រិយមិត្តជាច្រើនប្រាកដជាស្គាល់រួចហើយ ពី អតីតសមាជិកក្រុមរាំដ៏ល្បី OMG ឈ្មោះ តែ ស៊ុនសុដាលីកា ហៅក្រៅថា លីកា ដែលរូបនាង ពិតជាទទួលបានការស្រឡាញ់គាំទ្រខ្លាំងពីមហាជនលើបណ្ដាញសង្គម ជាមួយនឹងសមត្ថភាពរាំ ជាពិសេសរូបសម្រស់ដ៏ស្រស់សោភារបស់នាង។
យ៉ាងណាមិញ ស្រីស្អាតរូបនេះ តែងតែទទួលបានការចាប់អារម្មណ៍តាមដានពីអ្នកគាំទ្រ ជាមួយនឹងជីវិតផ្ទាល់ខ្លួនរបស់នាង ជាពិសេស គឺទំនាក់ទំនងស្នេហារបស់នាង ជាមួយគូស្នេហ៍ ដែលតែងបើកចំហលើបណ្ដាញសង្គម ព្រមទាំងបញ្ចេញនូវភាពផ្អែមល្ហែមជាមួយគ្នាជាហូរហែ។
ដោយឡែក នៅថ្ងៃទី១៨ ខែកក្កដា ឆ្នាំ២០២១នេះ កាន់តែចាប់អារម្មណ៍ និង ធ្វើឱ្យអ្នកគាំទ្រមានការភ្ញាក់ផ្អើលខ្លាំង បន្ទាប់ពីបានទទួលដំណឹងថា ស្រីស្រស់រូបនេះ និង គូស្នេហ៍ ត្រូវបានចាស់ទុំទាំងសងខាងចូលភ្ជាប់ពាក្យ ភ្ជាប់សម្ដីនឹងគ្នាហើយ ដែលប្រពៃណីខ្មែរហៅថា «ចូលចែចូវ ឬ ស្ដីដណ្ដឹង»។
នេះបើតាមការបង្ហោះរូបភាព និងសារលើបណ្ដាញសង្គម ឈ្មោះ តែ ស៊ុនណាង ដែលត្រូវជាឱពុករបស់តារាស្រីរូបនេះ ដោយលោកបាននិយាយថា «ដោយសារតែ Covid-19 ក្នុងនាមជាអាណាព្យាបាលកូនទាំងពីរ បានត្រឹមតែភ្ជាប់ពាក្យសម្តីប៉ុណ្ណោះ ដើម្បីរង់ចាំថ្ងៃល្អ បន្ទាប់ពីស្ងប់ស្ងាត់ពី Covid-19» ។
ក្នុងនោះដែរ ក៏បានឃើញ គូស្នេហ៍របស់នាង បានបង្ហោះលើបណ្ដាញសង្គមផងដែរ ថា «អរគុណប៉ាម៉ាក់ទាំងសងខាង ដែលបំពេញបំណងកូនទាំងពីរ Vun Saravuth Sunsodalyka Te 18.07.2021»។
ក្រោយឃើញបែបនេះ ធ្វើឱ្យមហាជន ជាពិសេសអ្នកគាំទ្រ បានចូលខមមិនអបអរសាទរ និង ជូនពរឱ្យអ្នកទាំងពីរបានចូលរោងជ័យឆាប់ៗផងដែរ៕
