កូវីដមិនថមថយ! ឆន សុវណ្ណារាជ ប្រុងប្រយ័ត្នខ្លាំងរហូតធ្វើរឿងមួយនេះ ស្ទើរតែរាល់ថ្ងៃ
សង្កេតឃើញថា តារាចម្រៀងប្រុសដ៏មានប្រជាប្រិយភាព លោក ឆន សុវណ្ណារាជ បើទោះបីជាស្ថានភាពកូវីដ-១៩ នៅកម្ពុជា នៅមានការរីករាលដាលខ្លាំងក៏ពិតមែន ប៉ុន្តែលោក នៅតែមានភាពមមាញឹកខ្លាំងជាមួយនឹងការងារសិល្បៈចម្រៀងរបស់លោក ដែលតែងលេចមុខក្នុងកម្មវិធីប្រគុំតន្ត្រីនៅតាមស្ថានីយ៍ទូរទស្សន៍ផ្សេងៗ។
យ៉ាងណាមិញ ជាមួយនឹងភាពមមាញឹកក្នុងការងារសិល្បៈនេះ ចាប់អារម្មណ៍ឃើញថា តារាប្រុសរូបនេះ នៅមួយរយៈនេះ តែងតែគិតគូរពីសុវត្ថិភាពផ្ទាល់ខ្លួន ក៏ដូចជាអ្នកជុំវិញខ្លួន និងមានភាពប្រុងប្រយ័ត្នខ្ពស់បំផុត ខណៈពេលដែលស្ថានភាពកូវីដ-១៩ នៅតែបន្តរកឃើញការឆ្លងរាលដាលច្រើននោះ ។
អ្វីដែលគួរឱ្យចាប់អារម្មណ៍ខ្លាំងនោះ គឺដើម្បីសុវត្ថិភាព លោក បានធ្វើការពិនិត្យសុខភាព ដោយការធ្វើតេស្តរហ័សរកជំងឺកូវីដ-១៩ ស្ទើរតែរាល់ថ្ងៃតែម្ដង។
នេះបើតាមការបង្ហោះរបស់ តារាប្រុសរូបនេះ ប្រាប់ដល់មហាជនពីលទ្ធផលតេស្ដរបស់លោក រាល់មុនចេញទៅបំពេញការងារម្ដងៗ។ ដោយលោកបាននិយាយថា «និយាយទៅគឺថាតេស្តរហ័សស្ទើរតែរាល់ថ្ងៃ តែមិនអីទេដើម្បីសុវត្ថិភាពខ្លួនឯងនឹងអ្នកដទៃ កុំភ្លេចណា៣កុំ៣ការពារ»។
នេះជាវិធីដ៏ល្អប្រសើរមួយ ដែលតារាប្រុសរូបនេះ បានធ្វើដើម្បីរក្សានូវសុវត្ថិភាពផ្ទាល់ខ្លួន ក៏ដូចជាអ្នកនៅជុំវិញខ្លួនរបស់លោក ក្នុងពេលដែលលោក កំពុងតែមមាញឹកជាមួយនឹងការងារសិល្បៈបែបនេះ៕
