ជា លាងឈែ ចេញមកប្រតិកម្មផាំងៗ ជុំវិញការប្រៀបធៀបគុណភាពកុនខ្មែរ និង បរទេស

ភាគច្រើនប្រិយមិត្តសុទ្ធតែបានស្គាល់ហើយ តារាសម្ដែងប្រុសរូបសង្ហា សាច់សខ្ចីដូចតារាកូរ៉េ លោក ជា លាងឈែ ដែលជាតារាសម្តែងដ៏មានទេពកោសល្យ និង ទទួលបានការគាំទ្រខ្លាំងពីសំណាក់មហាជន ។ ជាពិសេស រូបសម្រស់តារាប្រុសរូបនេះ តែងធ្វើឱ្យអ្នកគាំទ្រសរសើរមិនដាច់ពីមាត់ឡើយ ។

ថ្មីៗនេះ នៅលើបណ្ដាញសង្គម មិនថាហ្វេសប៊ុក ឬ Tik Tok នោះទេ ហាក់បីជាផ្ទុះរឿងរ៉ាវបន្ទាប់ពីធ្លាយដំណឹងថា ប្រទេសថៃគ្រោងនឹងសាងប្រាសាទចម្លងដូចនឹងប្រាសាទអង្គរវត្តខ្មែរ ។ ក្រោយពីផ្ទុះរឿងនេះ មកគេកត់សម្គាល់ឃើញថា មានមហាជនខ្មែរជាច្រើនសម្ដែងការមិនពេញចិត្តទៅកាន់ប្រទេសថៃ ដល់ថ្នាក់អ្នកគាំទ្រតារាថៃមួយចំនួនបាននាំគ្នា Unfollowed និង លែងគាំទ្ររឿងថៃទៀតផង ។

ជាមួយគ្នានោះ ក៏ផ្ទុះរឿងការប្រៀបធៀបរវាងរឿងភាគខ្មែរ និង រឿងបរទេសផងដែរ ។ ដោយគេកត់សម្គាល់ឃើញថា រាល់រឿងបរទេសតែងត្រូវបានមហាជនខ្មែរគាំទ្រច្រើនជាងរឿងខ្មែររបស់ខ្លួន ។

ជុំវិញរឿងរ៉ាវនេះស្រាប់តែគេឃើញតារាប្រុស លោក ជា លាងឈែ បានចេញមកប្រតិកម្មថា «និយាយឱ្យខ្លី ចង់ឱ្យកុនខ្មែរមានគុណភាពកម្រិតណាក៏បានដែរ ឱ្យតែមានលុយចាយ ហើយខ្ញុំសុំធានាថាបើកុនបរទេសចំណាយតិចដូចយើងគឺផលិតមិនបានគុណភាពដូចយើងនោះទេ ។ ជាចុងក្រោយវាសនាកុនខ្មែរគឺស្ថិតលើការគាំទ្រ និង យោគយល់ពីបងប្អូនខ្មែរទាំងអស់គ្នា» ៕