កន្លងទៅ ៧ ឆ្នាំហើយ ពេជ្រ សោភា នៅតែនឹកអាល័យឪពុក រហូតពោលពាក្យកម្សត់បែបនេះ

ជាការពិតណាស់ ថ្វីត្បិតតែសព្វថ្ងៃ តារាចម្រៀងស្រីល្បីឈ្មោះប្រចាំផលិតកម្មរស្មីហង្សមាស អ្នកនាង ពេជ្រ សោភា មានជីវិតរស់នៅយ៉ាងមានសុភមង្គល និងមានក្ដីសុខជាមួយនឹងភាពជោគជ័យក្នុងអាជីពសិល្បៈ ព្រមទាំងមុខជំនួញផ្ទាល់ខ្លួន ដែលតែងតែបង្ហាញនូវភាពរីករាយលើបណ្ដាញសង្គម។

ដោយឡែក នៅពីក្រោយនៃស្នាមញញឹមទាំងអស់នេះ ក្នុងចិត្តរបស់ តារាស្រីរូបស្រស់នេះ នៅតែបង្កប់ដោយភាពសោកសៅ ដែលតែងតែនឹករឭកចំពោះលោកឪពុកជាទីស្រឡាញ់ ដែលបានលាចាកលោកយ៉ាងកម្សត់ជាច្រើនឆ្នាំទៅហើយ ដែលឃើញម្ដងម្កាល នាងក៏បានបញ្ចេញមកក្រៅតាមរយៈការបង្ហោះសារផ្សេងៗ។

ជាក់ស្ដែង នៅថ្ងៃទី១៥ ខែកក្កដា ឆ្នាំ២០២១ នេះ ជាថ្ងៃគម្រប់ខួប ៧ឆ្នាំ ដែលឪពុកកម្សត់របស់តារាចម្រៀងស្រីរូបនេះ បានទទួលមរណភាព ដោយឃើញលើបណ្ដាញសង្គមរបស់នាង បានធ្វើការបង្ហោះរូបភាពចាស់ៗជាមួយលោកឪពុក និង សាររៀបរាប់បង្ហាញពីសេចក្ដីនឹករឭកដល់លោកឪពុកយ៉ាងរំជួលចិត្ត។ ក្នុងនោះ ពេជ្រ សោភា បានរៀបរាប់ថា « ពុកគេងយូរណាស់ ពួកកូនមិនទាន់បានធ្វើគ្រប់ដើម្បីពុកទេ ៧ឆ្នាំសុខទុក្ទយ៉ាងណា មើលមិនដឹង មើលមិនឃើញ ថានៅកន្លែងណា ពុកអើយពុក កូន​​ៗ​​ពុកនឹកពុកគ្រប់ពេល»។

ទន្ទឹមនឹងនោះ បន្ទាប់ពីបានឃើញការបង្ហោះសាររបស់ ពេជ្រ សោភា បែបនេះ ក៏បានធ្វើឱ្យមហាជនមានចិត្តអាណិត ព្រមទាំងបានចូលខមមិន ផ្ដល់កម្លាំងចិត្ត និងលើកទឹកចិត្តជាច្រើនដល់រូបនាងផងដែរ៕